Rita Ora në Tiranë

 Pak orë para koncertit të madh  në sheshin “Skënderbej”, këngëtarja me famë ndërkombëtare, Rita Ora u prit në një takim nga kryetari i Bashkisë së Tiranës, Erion Veliaj, dhe të dy së bashku ftuan qytetarët që t’i bashkohen këtij super eventi, për të festuar Tiranën si Kryeqyteti Europian i Rinisë 2022.

“Është një kënaqësi e jashtëzakonshme që Rita Ora është rikthyer në Tiranë. Këtë vit, Tirana është Kryeqyteti Europian i Rinisë dhe teksa kemi pasur një vit fantastik me shumë aktivitete, energji dhe të rinj nga e gjithë Europa, kemi treguar se ne, të rinjtë e Shqipërisë, të rinjtë e Kosovës, jemi po aq europianë, po aq mendjehapur, po aq zemërhapur dhe të talentuar, ashtu si edhe Rita vetë është prova domethënëse e talentit shqiptar”, tha Veliaj.

Kryebashkiaku falenderoi Rita Orën për shembullin pozitiv që u jep të rinjve dhe të rejave shqiptare. Veliaj theksoi se Rita është shembulli se si përmes punës dhe sakrificës arrihen gjërat e mëdha në jetë. “Duhet ta pranojmë se kombi ynë është një komb i vogël, i ndarë në disa shtete, por pyetja është: Si mundet një komb i vogël të japë një mesazh të madh? Këtë mund ta bëjmë me shembuj pozitivë, ndaj jam shumë i lumtur që Rita Ora është një shembull që na bën shumë krenar, që frymëzon vajza të vogla, djem të vegjël, se gjërat arrihen me punë, me shumë sakrificë”, deklaroi Veliaj.
Mes emocioneve për rikthimin në Tiranë, Rita Ora falënderoi kryebashkiakun Veliaj për mbështetjen e vazhdueshme. Këngëtarja shprehu krenarinë për origjinën e saj shqiptare dhe siguroi se nuk do të ndalet së promovuari atë.

Koncerti i Rita Orës, në skenën madhështore në zemër të Tiranës u mirëprit dhe u brohorit ngrohtas nga të rinjtë dhe qytetarë të shumtë.