Sunny Hill Festival

Në datat 26, 27, 28 Gusht 2022, në Tiranë,  pranë Liqenit Artifical, në  Fushën e Balonave,  u zhvillua Sunny Hill Festival. Ky aktivitet pati përmasa ndërkombëtare për sa i përket organizimit dhe të ftuarve të cilët debutuan në Festival.
Pas eksperiencës së organizimit të tij në Kosovë, ky Festival organizohet në Tiranë për herë të parë, në kuadër të promovimit të qytetit në vitin e tij si Kryeqytet Europian i Rinisë.

 Sunny Hill Festival - Tirana Edition, bëri të mundur angazhimin dhe bashkimin në festë të të rinjve të Shqipërisë, Kosovës dhe të rinjve nga vende të ndryshme të botës, të cilët ndanë emocione dhe eksperienca që i dhuron vetëm Sunny Hill Festival.
Ky aktivitet e kthen Tiranën në një qendër më të madhe kulturore për hir të rëndësisë që ky event ka me përfshirjen e të gjithë artistëve të huaj dhe shqiptarë të cilët performuan në të.  
Për tri netë me radhë, Tirana ishte një qendër mikpritëse për të gjithë artistët prezentë, të cilët shijuan performancat bashkë me publikun e shumtë të pranishëm.
Skena e ngritur ishte madhështore dhe efektet speciale e ndriçimi i jepnin hijeshinë e nevojshme për këtë event të veçantë. E gjithë hapësira e përdorur ishte e ndarë në zona të ndryshme ku publiku qëndronte, duke nisur nga zona VIP, zona CHILL dhe hapësirat e tjera promovuese me stenda dhe shërbime të ofruara për të gjithë dashamirësit që ishin prezent.
 
Disa nga artistët të cilët ishin të ftuar dhe performuan duke dhënë spektakël për të gjithë të pjesëmarrësit ishin: Fedez, Stormzy, Hardwell & Afrojack, Kamelia, Capital T, Ledri Vula, Mc Kresha dhe Lyrical Son, Elgit Doda, Mozzik, Getinjo.

 Performancat u shoqëruan me fishekzjarre dhe në të tri netët e aktivitetit, të gjithë të rinjtë e të rejat e pranishëm përjetuan emocione të jashtëzakonshme.