Takim me shkrimtarin Fatos Kongoli

Shkrimtari i mirënjohur, Fatos Kongoli, ishte në qendër të një takimi letrar, të organizuar nga Bashkia Tiranë, në datën 28 Shkurt 2024, në bashkëpunim me Bibliotekën Kombëtare dhe Institutin e Librit dhe të Promocionit.

Ky vit që përkon me 80 - vjetorin e tij të lindjes, e gjen shkrimtarin të lumtur dhe me një fond të gjerë librash të botuar, një pjesë e madhe e tyre të përkthyera në disa gjuhë të botës.

Takimi u zhvillua në sallën franceze të qendrës “Sotir Kolea” ku shkrimtari  Kongoli zhvilloi në një bashkëbisedim të ngrohtë me të  pranishmit ku foli mbi jetën dhe veprimtarinë e tij të gjatë letrare..

Dhimitraq Furxhiu, drejtori i Drejtorisë së Kulturës dhe Trashëgimisë Kulturore në Bashkinë e Tiranës, e vuri theksin tek autori Kongoli, si një rast i veçantë i matematicienit që iu përkushtua letërsisë, ku me ekzaktësinë që imponon shkenca dha kontribut në pasurimin e gjuhës shqipe.

Moderatorja, Majlinda Rama vlerësoi letërsinë e Kongolit, që ka depërtuar kaq natyrshëm tek lexuesi, ndërsa redaktorja e veprave të Kongolit, Nevila Hoxha  iu referua si një nga autorët më të lexuar, sidomos nga të rinjtë.

Aktiviteti vijoi më tej në formë bashkëbisedimi, ku pjesëmarrësit, studentë dhe nxënës, nëpërmjet pyetjeve patën mundësinë të njiheshin me krijimtarinë e shkrimtarit, me veprat e tij, metodat krijuese dhe fazat e para të lidhjes së tij me shkrimin.

Gjatë takimit u transmetua edhe një material i shkurtër mbi rrugëtimin e Fatos Kongolit, çmimet, nderimet, botimet dhe përkthimet. Më pas të pranishmit patën mundësinë të marrin libra me autografin e autorit si dhe të bëjnë foto në kujtim të këtij takimi mbresëlënës.