Takim me shkrimtarin Pëllumb Kulla. Nga cikli "Bisedë me autorë"

Text size
Aa Aa
Takim me autorin Pëllumb Kulla ishte aktiviteti që Bashkia e Tiranës, Drejtoria e Kulturës dhe Trashëgimisë Kulturore organizoi në datën 22 Nëntor 2022, në vijim të ciklit “ Bisedë me autorë”  që kjo Drejtori ka organizuar përgjatë muajve tetor-nëntor 2022, në vitin e Tirana Kryeqytet Europian i Rinisë.

Pëllumb Kulla është një  personalitet i shquar i letrave shqipe. Ai shquhet kryesisht për krijimtarinë e tij në gjinitë e dramës, komedisë, kupletit, regjisurës, prozës, por vitet e fundit ka lëvruar me sukses dhe ka botuar edhe në lëmin e  esesë politike, publicistikës,  etj. Megjithë fizikisht ai jeton midis Tiranës dhe Floridës në Shtetet e Bashkuara të Amerikës, ai është i pandarë dhe gjithnjë i pranishëm  në publicistikën dhe shtypin shqiptar me prononcimet e tij të shpeshta për të gjithë problematikën e aktualitetin e botës shqiptare, brenda dhe jashtë kufijve gjeografikë.

Takimi me z. Kulla vjen direkt pasi ai promovoi librat  e tij më të fundit, romanin “Rrëfenja nga Amerika”, vol. 3 në Panairin e Librit “Tirana 2022”, botim i TOENA, si dhe përmbledhjen e artikujve satirikë “Unë Grindaveci”, botuar nga UET Press, në qendrën COD (Qendra për Hapje dhe Dialog) pranë Kryeministrisë.


  "Bisedë me autorë",  kësaj here u zhvillua në formën e një bashkëbisedimi ku  morën pjesë maturantë dhe anëtarë të rrethit letrar të shkollave “Asim Vokshi” dhe “Sinan Tafaj” në kryeqytet. Takimi u zhvillua në ambientet e Bibliotekës “Misto Treska”.