Takim me z. Ylljet Aliçkaj, nga Cikli "Bisedë me Autorë"

Në vijim të ciklit “Bisedë me autorë”, që  Sektori i Trashëgimisë Kulturore ka iniciuar përgjatë muajit tetor, si “Muaji i Letërsisë dhe Arteve”, në datën 19 Tetor 2022, në Bibliotekën e  re të shkollës së saporindërtuar “Sami Frashëri”, në vitin e Tirana Kryeqytet Europian i Rinisë, u organizua një takim me z. Ylljet Alicka, Profesor dhe shkrimtar i njohur.

Ylljet Aliçkaj është një autor i mirënjohur i letërsisë sonë, tregimet dhe romanet e te cilit janë mirëpritur brenda Shqipërisë, por edhe jashtë, ku ai është përkthyer në mbi 13 gjuhë të huaja dhe nga shtëpi botuse prestigjioze.

Disa nga veprat e tij më të njohura janë “Parrullat në gurë”, “Valsi i Lumturisë”,  “Rrëfenjë me Ndërkombëtarë” dhe “Metamorfoza e  një Kryeqyteti”. Disa prej tyre janë kthyer në filma artistikë të suksesshëm dhe janë shfaqur edhe jashtë vendit. Dallohet filmi “Parrullat” me regji të Gjergj Xhuvanit dhe nje kast aktorësh të mirënjohur, që ka fituar disa çmime ndërkombëtare.

Takimi u zhvillua në trajtën e një bashkëbisedimi,  pyetje-përgjigje, ku z. Alickaj foli për krijimin, si proces, vlerat e mëdha të të  shkruarit,por edhe të  të lexuarit, për  fillesat e tij në krijimtari, për prozën si gjininë e tij të preferuar, eksperiencat e tij gjatë regjimit komunist por edhe në ditët e sotme.

 Nxënësit e pranishëm, maturantë dhe anëtarë të Klubit “Miku i librit” të shkollës, si dhe mësueset e tyre të lëndës së letërsisë ofruan një pritje të ngrohtë për shkrimtarin Aliçkaj.

Veçoria e takimit ishte se z. Aliçkaj është një ish nxënës i Sami Frashërit  dhe foli për kujtimet dhe përjetimet e veta si gjimnazist në ato ambiente që tani pas rindërtimit janë kthyer në ambiente dinjitoze kontemporane, ndryshim të cilin ai e vlerësoi me entuziazëm. Ai u impresionua pa masë nga Biblioteka e Shkollës për të cilën premtoi se do dhuronte një kolanë të plotë të veprave të tij.