Të dielën zhvillohet Maratona e Tiranës, mundësi fantastike për ekonominë e qytetit

Qyteti mirëpret të dielën edicionin e katërt të Maratonës së Tiranës, me pjesëmarrje sportistë profesionistë dhe amatorë nga mbi 42 shtete të ndryshme të botës. Për të koordinuar mbarëvajtjen e aktivitetit më të madh sportiv që zhvillohet në vendin tonë, kreu i Bashkisë së Tiranës, Erion Veliaj zhvilloi një takim me vullnetarë dhe institucione të tjera të angazhuara në organizimin e maratonës. Veliaj tha se ai do të garojë me një mesazh ndërgjegjësues për të prekurit nga tërmeti i 21 shtatorit.

“Mezi pres që qyteti të gëlojë. Këtë vit kemi vendosur që secili grup të vrapojë për një kauzë të caktuar. Unë do të vrapoj për të ngritur mbështetje për të gjitha shtëpitë që u rrënuan nga tërmeti; 40 të parat kanë filluar të ndërtohen, por kemi ende shumë nevojë. Ndaj, dua t’i bëj thirrje kujtdo që do të më mbështesë në kauzën time në maratonë, të na kontaktojë që t’i japim një dosje për secilën shtëpi”, tha Veliaj.

Ai e cilësoi Maratonën e Tiranës si një mundësi shumë të mirë jo vetëm për ekonominë e qytetin, por edhe për imazhin e saj në botë. “Imagjinoni 3500 shtretër në hotele, 3500 vakte, 3500 suvenirë, 3500 shpenzime dhe shopping; sa energji dhe fuqi ekonomike sjellin për qytetin. Do të kemi pjesëmarrës nga 42 shtete të huaja, duke filluar nga Australia, Filipinet, Zelanda, Kanadaja, SHBA, nga Korea, Kina dhe Japonia. Jam shumë entuziast që Tirana ka mundësinë të tregojë mikpritjen shqiptare, për t’u thënë të tjerëve se jemi kështu me të vërtetë dhe jo thjesht me fjalë”, shtoi ai.

Duke theksuar faktin se Maratona këtë vit, në një pjesë të itinerarit të saj, kalon edhe në zonën e Parkut të Liqenit që më parë ishte e zaptuar nga plehrat, Veliaj theksoi se është prova më e mirë se e njëjta punë, me të njëjtën cilësi, do të bëhet edhe te Kopshti Botanik. “Po të ishte për partinë e Lulit dhe të Monës, kujtoni si e kishin lënë pjesën tjetër të Liqenit, aty ku kemi bërë itinerarin e ri të Maratonës, te këndi i ri i lodrave: në kohën e tyre aty digjej plastika, ishte kthyer i gjithi në landfill. U çlirua sepse sot do të kalojë Maratona, e kemi si një kartolinë të Tiranës. Partia e Lulit dhe e Monës e kanë pasur ish komunën e Farkës, ku është Kopshti Botanik, bashkë me këta doktorët e plagjiaturave, që sot janë kryetarë dhe zëdhënësa partish; ata e kishin menaxhimin, sot dalin si mbrojtës të kopshtit. Kush? Një parti që zaptoi Liqenin dhe tjetra që i bëri autostradën mes për mes Kopshtit Botanik, kur mund të devijohej dhe të bëhej në një hapësirë tjetër. Hipokrizia e atyre që sot ulërasin për zhvillimet urbane, janë të njëjtët, kemi 5 vjet që i dëgjojmë: I dëgjuam te Sheshi ‘Skënderbej’, te Pazari i Ri, te Kalaja. Ja ku është Kalaja sot, një nga vendet më të vizituara”, u shpreh Veliaj.

Ai shtoi se sot Kopshti Botanik ka degraduar në një vendgrumbullim mbetjesh, për të cilin nuk kujdeset askush. “Kopshti Botanik ka qenë një nga hapësirat më të bukura në Tiranë, kurse sot është kthyer në një landfill plehrash në mes të Tiranës. Mjafton vetëm të bëni një xhiro dhe të shihni se si mblidhen të gjitha plehrat në Kopshtin Botanik, ku nuk vë dorë njeri jo vetëm për të hequr plehrat, por as të krasisë ferrat që e kanë rrethuar. Aty çdo ditë shihni “kaproj” që shqyejnë gardhin dhe futen mes për mes për të çarë shtigje primitive brenda Kopshtit Botanik. Qartazi UT, si shumë punë të tjera, është komplet i paaftë ta menaxhojë”, tha Veliaj.

Sipas tij, si në rastin e Kartës së Studentit, të cilën Universiteti nuk arriti ta bëjë realitet asnjëherë, ashtu edhe Kopshtin Botanik nuk ka qenë në gjendje ta menaxhojë siç duhet, duke e lënë në degradim të plotë. “Ky Mynyri i famshëm e kishte Kartën e Studentit, pse nuk e bëri? E kishte kompetencën, por sa e mori Bashkia e Tiranës, u bë. Aty ishin konviktet, ndërmarrje të lëna ndër vite, por sa i mori Bashkia e Tiranës u bënë. Do të thotë se në këtë qytet jemi ndarë shumë qartë: Janë ca që e marrin një punë, e çojnë deri në fund dhe ca të tjerë që marrin një punë, mundohen ta mjelin, e jo vetëm që nuk nxjerrin dot qimen nga qulli, por e shikojnë vetëm sesi mund të vazhdojnë të mjelin diçka që është abuzuar ndër vite”, shtoi Veliaj.

Ai theksoi se vendimi i qeverisë për t’ia kaluar këtë hapësirë Bashkisë së Tiranës është mundësia më e mirë ta ruajtur dhe pasuruar me bimësi të tjera. “VKM-ja e kryeministrit Rama, e qeverisë tonë, hipoteka e Bashkisë së Tiranës, garanton ruajtjen, sepse këta s’e ruanin dot. PD që reagoi sot ishte e vetmja që i ka vjedhur një copë Kopshtit Botanik. Fuqia më e madhe gjelbëruese, fuqia më e madhe estetike, infrastrukturore, mbjellëse, botanike, fuqia më e madhe që transformon realitete urbane në Tiranë është Bashkia”, shtoi Veliaj.

Kryebashkiaku siguroi se me investimet dhe vëmëndjen që do të ketë Bashkia e Tiranës, Kopshti Botanik do kthehet realisht në një hapësirë model studimore dhe shkencore për studentët dhe studiuesit e ndryshëm.