Të huaj që nuk ndjehen të huaj në Tiranë

Text size
Aa Aa

Në datën 28 Shkurt, në orën 17.00, në sallën Black Box të Akademisë së Arteve në Tiranë, u promovua dokumentari “Të huaj që nuk ndjehen të huaj në Tirane”, në kuadër të shpalljes së Tiranës - Kryeqytet Europian i Rinisë për vitin 2022. 

Tirana si qytet metropol dhe kozmopolit ka hapur dyert dhe është treguar mikpritës për shumë të rinj dhe të reja nga vende të ndryshme të botës.

Të pranishëm në këtë event ishin studentë dhe pedagogë të Akademisë së Arteve, si edhe të rinj të kombësive të ndryshme, miq dhe të afërm të tyre, njerëz të cilët kanë zgjedhur Tiranën si qytetin në të cilin të ndërtojnë karrierën dhe të ardhmen e tyre.

 Që në hyrjen e Akademisë së Arteve ishin vendosur posterat e dokumentarit, qe shoqëronin rrugëtimin e secilit të ftuar deri në sallën ku zhvillohej aktiviteti.

Përpara se të niste transmetimi i dokumentarit, u mbajt fjala përshëndetëse nga grupi organizator, të cilët shpjeguan për të gjithë të pranishmit në sallë qëllimin e dokumentarit, grupet e synuara dhe emocionet e përfshira në të gjithë procesin e punës.
Në dokumentar, të gjithë të intervistuarit përmendën dhe vlerësuan si një ndër faktorët kryesorë e që u jep më tepër kënaqësi në qëndrimin e tyre në  Tiranë, mikpritjen dhe dashamirësinë e të gjithë qytetarëve. Diçka që theksohej vazhdimisht ishte përcjellja e vlerave njerëzore dhe humane, toleranca fetare si dhe përfshirja e të gjitha kulturave.

Këto e të tjera erdhën aq natyrshëm përmes rrëfimeve dhe përvojave të vetë të rinjve të huaj në Tiranë, personazhe të këtij realizimi krijues. Dokumentari u ndoq me shumë interes nga të gjithë të pranishmit.
Në përfundim, u zhvillua një sesion diskutimi me të gjithë të ftuarit dhe stafin organizues.