Thesaret e fshehura

Në datë 11 shkurt, me rastin e 102 vjetorit të shpalljes së Tiranës kryeqytet, u organizua projekti “Thesaret e fshehura”. Synimi i këtij projekti ishte njohja e trashëgimisë kulturore e vlerave të qytetit të Tiranës për një audiencë më të gjerë, nëpërmjet promovimit që iu bë 6 shtëpive autoktone  të vjetra tiranase. Projekti u organizua me një grup koordinatorësh që evidentuan paraprakisht disa prej shtëpive më të vjetra e me histori të ndryshme tiranase, ku për secilën shtëpi e sipas specifikave që ajo ofronte u caktua nga një kurator, i cili do të kujdesej për të nxjerrë në pah të veçantat e secilës shtëpi, që nga elementet humane, objekte me rëndësi të veçantë arkitekturore, tradita të hershme autoktone etj. 
Projekti u prezantua te familjarët e secilës shtëpi e më pas ata bashkëpunuan me kuratorin dhe rrëfyesin e historisë, të cilët për disa ditë radhazi u njohën me historinë e secilës shtëpi nëpërmjet bisedave, fotove të familjes, hartave e dorëshkrimeve. Secili kurator arriti të sjellë në vëmendje elementë të veçantë e origjinalë të familjes të pazbuluara deri në ato momente për publikun e gjerë. Gjatë procesit të punës kuratorët u mbështetën nga një konsulent i trashëgimisë kulturore, i cili i ndihmoi ata për të siguruar materiale arkivore e dokumenta të tjera të lidhura me projektin. 
Në terma afatgjatë projekti synon t’i kthejë këto shtëpi të vjetra tiranase në mini-muze të hapura për turistët dhe për të tjerë target grupe që janë të interesuar për t’i vizituar ato, si studiues, gazetarë, ekspertë të trashëgimisë kulturore, fotografë, fotoreporterë etj. 
 Shtëpitë që u vizituan gjatë ditës së aktivitetit: 
1.Sarajet e Toptanasve - 11:00 - 14:00 
2.Teqeja e Dervish Hatixhesë - 14:00 - 14:45 
3.Shtëpia Muze - 15:00 - 15:45 
4.Shtëpia e Sali Shijakut - 16:00 - 17:30 
5.Shtëpia e familjes Begeja 18:00 - 19:00
6.Shpirti i Tabanit - 19:00 - 23:00