Tirana i kthehet normalitetit, prezantohet strategjia 4-vjeçare për rininë

Tirana ka kaluar fazën e emergjencës së pas tërmetit dhe me sistemimin e të gjitha familjeve të prekura prej tij, në shtëpi me qira apo në qendrat sociale, kryeqyteti i është kthyer normalitetit. Kryetari i Bashkisë së Tiranës, Erion Veliaj, në 8 Dhjetor, Ditën e Rinisë, mori pjesë sot në prezantimin e strategjisë 4-vjeçare për rininë të Bashkisë Tiranë, ndërsa theksoi se kjo është një ditë e rëndësishme për kryeqytetin edhe për faktin se sot i jepet fund situatës së emergjencës që shkaktoi tërmeti. Kryebashkiaku tha se sot është mbyllur dhe qendra e fundit e përkohshme e emergjencës në shkollën “Betim Muço” në Kombinat, ndërsa që nga dita e nesërme institucionet arsimore do i kthehen mësimdhënies. 

“Sot është një ditë e rëndësishme për Tiranën. Sapo u njoftova që kemi mbyllur edhe qendrën e fundit të emergjencave, që ishte palestra te “Betim Muço”. Jo sepse ka mbaruar emergjenca, ne do të kemi qendra sociale, do të vazhdojë të jepet shërbim, në fshatra do të vazhdojmë të çojmë ndihma. Por, i kemi mbyllur qendrat e emergjencave pasi u shpërndanë edhe 1000 pagesa qirash sepse duam të japim sinjalin që jeta vazhdon dhe nuk mund të vazhdojmë të jetojmë si në rrethim, si në luftë dhe në zi”, u shpreh Veliaj.

Gjithashtu, ai theksoi se pas çerdheve dhe kopshteve, duke filluar që nga dita e nesërme, edhe shkollat do të kthehen në funksionin e tyre normal. Ai bëri të ditur se shkollat janë inspektuar nga 4 grupe të ndryshme ekspertësh dhe inxhinierësh. Ndërkohë që, për ato pak shkolla që kanë shfaqur probleme serioze, siç është ajo në Pezë apo Pezë e Vogël, është marrë vendimi i prishjes dhe rindërtimit nga e para, ndërsa nxënësit do të transferohen në shkollat më të afërta.

Për një numër shumë të vogël shkollash të tjera të cilat kanë nevojë për meremetime, Veliaj bëri të ditur se edhe për to do të merret dhe pak kohë, kurse nxënësit e tyre do të transferohen në shkollat e afërta, për të mos humbur asnjë orë mësimi. “Në ato pak shkolla ku do bëjmë disa punë, që janë meremetime të thjeshta, si te shkolla ime “Sami Frashëri”, që ka vetëm suvatime dhe lyerje, apo disa shkolla të tjera në Tiranë, ku do na duhet edhe 10 ditë kohë për t’i rihapur në janar, thjesht do bëjnë mësime me dy turne në një shkollë tjetër dhe do e menaxhojmë si çdo vend serioz, dinjitoz që kur vjen një krizë përballet pa kaluar në histeri dhe pa kaluar në panik”, u shpreh Veliaj.

Ai u bëri thirrje të gjithë bizneseve që të hapin vende pune. Veliaj nënvizoi se akti më i madh patriotik që mund të bëjë çdo kush që ka mundësi është të punësojë djem dhe vajza që mund të kontribuojnë për shoqërinë. “Për të gjithë sipërmarrësit që duan të bëjnë diçka për tërmetin, kriza emergjente mbaroi, por hapni vende pune, punësoni çuna dhe goca që kanë nevojë që duke qenë në punë të mendojmë më pak për tërmetin dhe të mendojnë më shumë për shoqërinë dhe familjen e tyre. Po  bëre këtë, është akti më i madh patriotik që ti mund të bësh për ekonominë shqiptare pas tërmetit”, theksoi Veliaj.

Kreu i Bashkisë u ndal edhe në zhvillimin e lagjeve të reja në kryeqytet të cilat pas tërmetit do të kenë një vëmendje edhe më të shtuar. Ai nënvizoi se kjo ngjarje që ndodhi do të kthehet edhe në një oportunitet për zhvillimin e këtyre zonave. “Kur them që çdo krizë është mundësi, kjo është jo vetëm për shoqërinë, por është dhe për infrastrukturën. Ne kishim planifikuar që do të kishim një qendër të madhe rinore, por me këto tre lagjet e reja që kryeministri ka propozuar në Tiranë, pra edhe pranë Lumit, edhe në Kinostudio, edhe në Shkozë, në fakt janë tre vende ideale të marxhinalizuara. Por po të rikthehen me arkitekturë moderne, me infrastrukturë moderne dhe të kenë edhe këto që ne kemi pasur ide dhe ambicie, qendra rinore dhe komunitare, kjo krizë është edhe një mundësi për t’i dhënë jetë disa zonave”, tha Veliaj.