Shpërndaje
Text size
Tirana është sot mikpritëse e një prej eventeve më të rëndësishme rajonale të vitit, ALForum 2025, që zhvillohet nga datat 18-20 qershor në kryeqytetin shqiptar. Forumi organizohet nga Fondacioni Anna Lindh, në bashkëpunim me Bashkinë e Tiranës dhe Ministrinë për Evropën dhe Punët e Jashtme të Shqipërisë.
Gjatë tri ditëve të forumit, rreth 1,000 pjesëmarrës nga 43 vende të rajonit euro-mesdhetar, përfaqësues të shoqërisë civile, akademikë, media, të rinj liderë, institucione dhe figura me ndikim, do të diskutojnë dhe ndajnë ide për forcimin e bashkëpunimit, dialogut ndërkulturor dhe zhvillimit të qëndrueshëm në rajon.
Në fjalën e saj përshëndetëse, Kryetarja e Komanduar e Bashkisë së Tiranës, Anuela Ristani, vlerësoi rolin që Tirana ka marrë në vitet e fundit në nxitjen e dialogut dhe bashkëpunimit ndërkulturor:
“Tirana mban me krenari titullin ‘Kryeqyteti Mesdhetar i Kulturës dhe Dialogut’, por jo vetëm me krenari, e mban me një qëllim, sepse ky titull nuk është thjesht kapitulli i fundit i historisë së qytetit, por një hap përtej saj, një hap që e orienton drejt Evropës. Ne jemi një qytet që nuk mbështetet mbi dhimbjet e së kaluarës. Ne i kthejmë ato në platforma dhe ecim përpara me shpejtësi” , tha Ristani.
Më tej, Ristani rikujtoi disa nga titujt që Tirana ka mbajtur vitet e fundit, duke i cilësuar si momente që kanë forcuar rolin e saj si një qendër e dialogut dhe përfshirjes në nivel ndërkombëtar.
“Tirana ka qenë ‘Kryeqyteti Evropian i të Rinjve’, duke vendosur energjinë dhe zërin e tyre në zemër të qytetit. Kemi qenë ‘Qyteti Evropian i Sportit’, ku lëvizja ka sjellë unitet në të gjitha nivelet dhe komunitetet. Në vitin 2024, morëm presidencën e rrjetit B40, që bashkon qytetet e Ballkanit, duke e ngritur bashkëpunimin rajonal në një nivel të ri nga lokalja në atë kontinentale”.
Në përfundim të fjalës së saj, Ristani theksoi se këto arritje nuk janë vetëm tituj formalë, por dëshmi konkrete të transformimit të Tiranës në një qendër aktive e angazhuar për paqe e siguri në rajon dhe më gjerë.
“Të gjitha këto arritje nuk janë thjesht udhërrëfyes, ato janë sinjale për rajonin, për Evropën dhe për botën, që Tirana ka kaluar nga periferia në qendër të dialogut ndërkulturor. Tirana është bërë një vend i sigurt për të zhvilluar biseda të vështira, një skenë për krijimtari të përbashkët dhe një platformë për paqe dhe siguri”, përmbylli Ristani.
Shpërndaje