Tirana Përmes Tingujve

Vazhdon udhën cikli i leksioneve të hapura organizuar nga Bashkia e TIranës, Sektori i Trashëgimisë Kulturore, në bashkëpunim me Akademinë e Studimeve Albanologjike. Prezantimi i radhës, që u mbajt nga Dr. Mikaela Minga e Institutit të Antropologjisë Kulturore dhe Studimit të Artit për nxënësist e shkollës “Sami Frashëri”, u fokusua në Trashëgiminë Shpirtërore të Tiranës në muzikë. 

Dr.Mikaela Minga me ligjëratën e saj “Tirana përmes Tingujve”,  i ftoi gjimnazistët të përshkonin së bashku një itinerar në muzikën e Tiranës, me historinë e saj të këngëtarëve dhe instrumentistëve.
Të rinjtë kanë sot të gjitha mundësitë të dëgjojnë muzikën që duan, në lloje të ndryshme platformash, por çështja është: a janë ata dëgjues aktivë dhe inteligjentë të muzikës, apo janë dëgjues pasivë?
Dr.Minga e praktikoi mënyrën aktive të të dëgjuarit të muzikës duke iu prezantuar të rinjve këngë nga repertori i Tiranës, asaj paraurbane dhe urbane, e deri shembuj të hip-hop-it, kur ai është vërtet një hip-hop i mirë. Ajo u ndal te repertori historik i Tiranës që është zhvilluar përmes trashëgimisë së dijes muzikore në sajë të grupimeve familjare, rol që familjet Zyberi apo Lela e kanë luajtur më së miri. Pinjollët e Lelave vazhdojnë të jenë aktivë edhe sot.
Formacionet muzikore, në vende dhe situata të ndryshme, me të kënduarit të dialekt, me artistë popullorë si Skënder Reka, Remzi Lela, Fitnete Rexha, Hafsa Zyberi, Safete Toska e të tjerë, janë pjesë e kësaj Tirane nga vitet ’20 deri në vitet ’70 të shekullit të kaluar.
Nxënësit dëgjuan një regjistrim të viteve ’30 të një simboli muzikor të Tiranës siç është “Vallja e napolonit”, interpretuar nga sazet e Bilbil Vlorës.
Muharrem Gurra, mbledhës folklori dhe një nga muzikantët aktivë deri në vitet ’70, është një tjetër personazh, krijimtaria e të cilit vazhdon të jetojë përmes zërave bashkëkohorë. Nxënësit u njohën me një version xhaz të këngës së Gurrës “Qan lulja për lulen”, kënduar nga Eda Zari.
Dr.Minga bëri një tjetër krahasim të guximshëm të muzikës lirike dhe sentimentale të Gurrës me shqetësimet sociale, protestën dhe reflektimin që sjell në muzikën hip-hop Aris Demaj, i njohur me emrin e artit “Killua” (ish-nxënës i “Sami Frashërit”). Ajo i ftoi të rinjtë të dëgjojnë në mënyrë aktive albumin e tij të parë që sapo ka dalë në qarkullim “Rrno për me tregue”. Ftesa është për të dëgjuar jo ata këngëtarë që e kanë kthyer muzikën hip-hop-in në mall komerci, por ata artistë që i shprehin shqetësimet e tyre sinqerisht se çfarë do të thotë të jetosh në një qytet si Tirana.
Më pas, nxënësit të shoqëruar nga mësuesja e tyre, bënë një tur vizitues në Muzeun Arkeologjik, ku morën një informacion të plotë nga specialistja e këtij Muzeu, mbi koleksionin e ekspozuar .