Tirana shpallet Kryeqyteti Europian i Rinisë 2022, një sukses i jashtëzakonshëm për të rinjtë shqiptarë

Tirana u shpall dje në mbrëmje “Kryeqyteti Europian i Rinisë” për vitin 2022, duke triumfuar pas një gare goxha të fortë me 4 qytete të tjera finaliste si; Baia Mare (Rumani), Kazan (Rusi), Poznań (Poloni) dhe Varaždin (Kroaci). Vendimi u dha nga një juri e specializuar me përbërje të përfaqësuesve nga organizata dhe institucionet më të rëndësishme europiane si; Parlamenti Evropian, Kongresi i Autoriteteve Lokale dhe Rajonale të Këshillit të Evropës, Këshilli i Rinisë i Këshillit të Evropës etj.

Momenti kur Tirana u shpall Kryeqyteti Europian i Rinisë për vitin 2022 ishte i papritur, i mbushur plot emocion edhe për delegacionin shqiptar që kryesohej nga kryebashkiaku Erion Veliaj. Stafi i Bashkisë së Tiranës punoi për më shumë se një vit për suksesin e djeshëm. Tirana u vlerësua për fokusin tek të rinjtë, duke filluar nga ata më të vegjlit, me çerdhet, kopshtet, shkollat, këndet e lodrave etj. Suksesi i djeshëm në Amiens është një mundësi fantastike për ta kthyer Tiranën 365 ditë plot me aktivitete dhe në një pikë takimi për mijëra të rinj nga shumë vende të Europës.

Në ceremoninë në Amiens mori pjesë edhe Presidenti Francez, Emanuel Makron, i cili tha se rinia ka një rol të rëndësishëm në Europë për mbrojtjen e vlerave të padiskutueshme siç janë kultura, demokracia, klima, ekologjia. “Rinia sot në Europë dhe në Francë luan një rol të rëndësishëm. Janë disa kushte që dua t’i ndaj me juve, siç janë kultura, demokracia, klima, ekologjia, dhe angazhimi ynë për Europën tonë. Duhet të punojmë të gjithë dhe të kemi entuziazmin për të përcjellë ngjyrat e Europës, vlerat e saj. Kjo është përgjegjësia jonë!”, tha Macron.

Të ftuar specialë të pranishëm gjithashtu përfshinin Frédérique Vidal, Ministrin e Arsimit të Lartë, Kërkimit dhe Inovacionit, Gabriel Attal, Sekretarin e Shtetit për Rininë, Laurent Somon, Presidentin e Département de la Somme dhe Kryetarin e Amiens, Brigitte Fouré.

Carina Autengruber, Presidente e Forumit Rinor Evropian, në fjalën e saj, theksoi angazhimin që ka treguar Tirana për të merituar këtë vlerësim, si një qytet ku të rinjtë janë në qendër të vëmendjes. “Urime Tirana! Ju keni treguar një angazhim të madh për të ndërtuar një trashëgimi të qëndrueshme që do t'i vendosë të rinjtë në zemrën e qytetit tuaj”, tha ajo.

Si Kryeqyteti Europian i Rinisë 2022, Tirana do të ketë një program ambicioz që do të synojë të adresojë nevojat e të gjithë të rinjve të saj dhe do të përpiqet të lidhë qytetin dhe rininë e tij me vlerat evropiane.