Tirana solidarizohet me Athinën, 50 mijë euro ndihmë

Tirana solidarizohet me situatën në Athinë dhe i ofron asaj ndihmë për përballimin e gjendjes që shkaktoi zjarri apokaliptik, i cili përfshiu një lagje të kryeqytetit grek. Siç premtoi dy ditë më parë, kryetari i Bashkisë së Tiranës, Erion Veliaj, Këshilli Bashkiak miratoi dhënien e një ndihme financiare prej 50 mijë eurosh për lehtësimin e pasojave të dëmeve të shkaktuara nga zjarri masiv. Në fjalën e tij para Këshillit Bashkiak, Veliaj u shpreh se kjo është një ndihmë modeste, por që tregon se Tirana i gjendet sot Athinës në krah për të përballuar këtë fatkeqësi.

“Fqinjët nuk duken kur gjërat janë mirë dhe i hedhin batuta njëri-tjetrit; fqinjët duken në situata të vështira, ndaj kam komunikuar me kryetarin e Bashkisë së Athinës, për t’i shprehur në emrin tuaj gjithë solidaritetin dhe propozoj që të akordojmë një shumë prej 50 mijë eurosh nga Bashkia e Tiranës. Në mënyrë të ngjashme kemi vepruar edhe në raste të tjera me bashkitë fqinje, kurse sot po u gjendemi pranë kushërinjve tanë dhe shqiptarëve që jetojnë në Greqi. Ndaj, do të doja që ashtu siç bëri qeveria shqiptare, sigurisht me dyfishin e fondit tonë, ashtu edhe Bashkia e Tiranës i bashkohet vendimit të kryeministrit për t’u solidarizuar edhe në nivel qytetesh simotra, siç është Tirana me Athinën”, tha Veliaj.

Ndërkohë, me propozim të ardhur nga komuniteti i aktorëve, Këshilli Bashkiak miratoi edhe vendimin për ndryshimin e emrave të shkollave “Sabaudin Gabrani” dhe “Androkli Kostallari”, të cilave u vendosi emrat e dy aktorëve të njohura të skenës shqiptare, Drita Pelinku dhe Marie Logoreci.

“Kemi sot dy shkolla me dy ndërtesa, me dy drejtori, me dy stafe pedagogjikë. Me propozim të komunitetit të aktorëve, po vendosim që shkollat e dyta të marrin emrin e dy zonjave të nderuara. I ka hije një qyteti, i cili barazinë gjinore e ka të theksuar në administratë, këtu në Këshillin Bashkiak. Emërtimet në Tiranë 80% janë emra burrash dhe 20% emra grash. Kjo ka të bëjë edhe me një vendim që, nga tani e tutje, të fillojmë ta kthejmë këtë balancë. Patjetër që, do të nderojmë burra të nderuar të këtij vendi, por do të bëjmë një diskriminim pozitiv duke e vënë theksin tek emërtimet e zonjave të nderuara të Shqipërisë që meritojnë gjithashtu një vlerësim”, theksoi ai.

Në mbledhjen e sotme të Këshillit Bashkiak u miratua edhe vendimi për hapjen në ambientet e shkollës “Ardian Klosi” të një kopshti dhe çerdhe të integruar, që do t’i vijë në ndihmë banorëve të Njësisë 4 në Tiranë. Aktualisht, godina është e përfunduar dhe e mobiluar dhe gati për t’u shfrytëzuar dhe për t’u vënë në funksion për shërbime me standarde. Këshilli miratoi një sërë vendimesh të tjera të rëndësishme që kanë të bëjnë me dhënien e ndihmës sociale dhe pagesat për kategoritë vulnerabël të Tiranës. Më konkretisht, u miratua vendimi “Për dhënien e ndihmës ekonomike për periudhën 1 – 31.07.2018”; vendimi “Për miratimin e pagesës për PAK dhe Invalidët e Punës, për periudhën 1 – 31 korrik 2018”; vendimi “Për miratimin e familjeve aplikuese që përfitojnë nga programi i bllok ndihmës ekonomike deri në 6% nga fondi i kushtëzuar dhe nga buxheti i Bashkisë Tiranë për periudhën 1 – 30 qershor 2018” dhe vendimi “Për miratimin e kompensimit të çmimit të energjisë elektrike për kategorinë përfituese për periudhën 1 – 30 qershor 2018”.

Këshilli Bashkiak miratoi gjithashtu edhe vendimin për zbatimin e udhëzuesit operacional “Mbi përfitimin e bonusit të strehimit në Bashkinë Tiranë”. Një vendim shumë i rëndësishëm që sjell një unifikim të procedurave për përfitimin e bonusit të qirasë, i cili deri më sot ka munguar. Këshilli miratoi gjithashtu marrëveshjen e bashkëpunimit midis Bashkisë së Tiranës dhe Fondacionit Shoqëria e Hapur për Shqipërinë për realizimin efektiv të projektit “Hapja e tregut publik të rrobave të përdorura për nxitjen e vetëpunësimit dhe tregtinë ambulatore të komunitetit Rom dhe Egjiptian”, në rrugën “Ali Shefqeti”, Njësia Administrative Nr.1, Tiranë.

Ndër vendimet e tjera të miratuara në mbledhjen e sotme të Këshillit Bashkiak ishin edhe ai për “Për disa ndryshime në vendimin nr.81, datë 26.07.2017 të Këshillit Bashkiak “Për miratimin në parim të studimit të fizibilitetit dhe të kontratës “Tip” të partneritetit publik privat “Për përmirësimin e infrastrukturës arsimore në Bashkinë Tiranë”, ndërmjet Bashkisë Tiranë dhe partnerit privat””; “Për dhënien në përdorim Agjencisë së Ofrimit të Shërbimeve Publike të Integruara (ADISA), të një sipërfaqeje prej 372 m2 e regjistruar me numër pasurie 7/521 në zonën kadastrale 8230, Tiranë”; “Për hapjen e institucionit arsimor publik parashkollor në ndërtesën e projektuar “Kopsht dhe Çerdhe”, të integruar, në Njësinë Administrative Nr.4” si dhe vendimi për “Për një ndryshim në vendimin nr. 15, datë 10.3.2004 të Këshillit Bashkiak për strukturën organizative dhe nivelin e pagave të Drejtorisë Nr. 3 të Punëtorëve”.