Tiranës i shtohen mbi 108 mijë pemë të reja

Bashkia e Tiranës ka mbajtur premtimin e dhënë për mbjelljen e 100 mijë pemëve të reja deri në 21 Mars. Falë angazhimit të shumë qytetarëve, institucioneve, qindra bizneseve e donatorëve që iu bashkuan këtij aksioni, numri i pemëve të mbjella deri më sot ka shkuar në 108.328. Por, nisur nga kërkesa e madhe e qytetarëve dhe subjektet e tjera private që janë regjistruar në radhën për të mbjellë pemë, ky aksion do të shtyhet deri në një datë tjetër të rëndësishme, 22 Prill, Ditën e Tokës.

I pranishëm në mbjelljen e pemëve të reja në liqenin e Farkës, kryebashkiaku Erion Veliaj deklaroi se për shkak të interesit të lartë dhe numrit të qytetarëve dhe të kompanive që janë regjistruar në listë pritje për të dhuruar pemë, aksioni për mbjelljen do të vijojë dhe për një muaj tjetër.

“Sot më informuan që kemi edhe 145 subjekte që ende nuk e kanë bërë donacionin e tyre. Duke parë motin, edhe faktin që ka ende shira dhe është ende freskët, do ta shtyjmë deri në datën 22 prill fushatën tonë të mbjelljeve, që t’i japim mundësi kujtdo që e la për ditën e fundit të mbjellë pemët e veta. Për të gjithë ata që janë mërzitur nga fushata duke parë mbjelljet, ta ndryshojnë stacionin, ndërsa ne të tjerët do të vazhdojmë të mbjellim pemë deri në datën 22 prill, që të kemi një Tiranë fantastike dhe më të gjelbër”, u shpreh kreu i Bashkisë së Tiranës.

Ai deklaroi se ky aksion qytetar tregoi se gjithçka mund të arrihet përmes energjisë pozitive dhe me vepra konkrete. “Ia dolëm, bravo ju qoftë! Unë besoj që për çdo njeri që thotë ky vend s’bëhet, Shqipëria s’bëhet, Tirana s’bëhet, s’bëhen këta njerëz, ka një mijë të tjerë për çdo një prej këtyre cinikëve që thonë: Po, bëhet, por duhet t’ia fillojmë sot, tani, të gjithë bashkë, me energji pozitive dhe me vepra konkrete. Së pari, dua ta falenderoj të gjithë fëmijët e Tiranës sepse ata janë njerëzit më idealistë, e duan qytetin pa hile, pa interes. Shumë prej tyre kanë festuar ditëlindjet duke mbjellë një pemë, shumë prej tyre kanë ardhur e kanë sjellë prindërit nga qytete të tjera”, tha Velliaj.

Ai falënderoi të gjitha ata individë, organizata, institucione shtetërore, përfaqësi të huaja që u bënë pjesë e këtij projekti duke i dhënë qytetit më shumë gjelbërim, por duke kontribuar për një jetë më të mirë për gjeneratat e ardhshme. Gjithashtu, Veliaj falënderoi të gjithë drejtuesit e njësive Administrative si dhe Agjencinë e Parqeve dhe Rekreacionit për përkushtimin që kanë treguar në gjithë këto muaj të këtij aksioni. “Kjo energji fantastike që pamë sot ka qenë në të gjitha njësitë e Tiranës, duke filluar nga pemët që janë mbjellë në Shëngjergj deri në ekstremin tjetër në Ndroq, nga pemët e pafundme që mbollëm në Krrabë dhe deri në ekstremin tjetër në Kashar. Mjafton të shikoni Unazën Jugore për të parë se si është qëndisur ajo unazë për të kuptuar dhe për të hapur vizionin tonë se çfarë mundësie fantastike do na ofrojë Pylli Orbital”, tha Veliaj.

Kryebashkiaku iu përgjigj edhe skeptikëve, të cilët nuk besonin fillimisht se Tirana do të niste një epokë të re për kujdesin ndaj mjedisit. “M’u kujtua historia e këndit të lojërave, e cila ishte një histori e ngjashme, një sherr e shamata, këtu do bëhet nami, hataja dhe po të shohësh, shumë nga këta që e quajnë veten “ambientalistë”, vërtet mund të kenë diploma ambientalisti, që nuk i kemi ne që merremi me punë të tjera, por nuk mbillen pemët duke ndenjur përditë në studio e duke bërë si gjithologë e duke protestuar për çdo vepër të mire”, tha Veliaj.

Ai deklaroi se nëse ekziston vullneti dhe dashamirësia, shqiptarët mund të jenë super qytetarë europianë. “Po ndryshon mentaliteti. Nga një mentalitet i viteve ‘90, ku shquheshim vetëm se çfarë i bënim natyrës, se si i prisnin pemët, vetëm se si shkatërronim bukuritë natyrore. Ne jemi europianë kur vendosim që të jemi europianë, kur nuk zihemi me njëri-tjetrin, kur nuk i vëmë stërkëmbësha. Po kur bashkëpunojmë, jemi super qytetarë europianë”, tha ai.

Një lajm të mirë kryetari e dha edhe për të gjithë të apasionuarit pas natyrës dhe për banorët e Farkës, duke deklaruar se kjo zonë e cila dy vite më parë ishte e mbuluar nga plehrat, do të jetë një tjetër hapësirë e gjelbër e kryeqytetit sikurse është tashmë Parku i Madh i Liqenit Artificial. “Përpara dy vjet e gjysmë ky vend ishte një landfill i madh. Vetëm plehra në gjithë brigjet e liqenit të Farkës. Nuk mbinte fija e barit, jo kaq pemë. Sot ka një shëtitore. Sot janë mbjellë mijëra pemë. Unë jam i bindur se gjenerata e vogëlushëve që janë këtu kur të vijnë në moshën tonë do të kenë një park të ri të liqenit të Farkës që do të ngjajë siç është Parku i Tiranës sot”, tha ai.

Vetëm sot në kryeqytet u mbollën 6886 pemë të reja, prej të cilave shkurre 2000; pisha 3190 si dhe 1696 pemë të tjera. Në total numri i pemëve të reja të mbjella në këtë fushatë arrin në 108328.