Tre Tenorët për Ukrainën

"Tre tenorët për Ukrainën" me mesazhin "Artistët për Artistët", ishte  koncerti i jashtëzakonshëm operistik që u u organizua në 18 shtator, në Teatrin Kombëtar të Operës dhe Baletit.

Në koncert morën pjesë  këngëtarë dhe muzikantë ukrainas e shqiptarë. Koncerti u shoqërua nga orkestra simfonike shqiptare me pjesëmarrjen e muzikantëve ukrainas dhe në dirigjimin  e  Leonardo Quadrini (Itali). Këngëtarët që debutuan ishin: solistët ukrahinas Mykhailo Malafii dhe Vitaly Kovalchuk si dhe solistët e Operës së Tiranës, Klodian Kaçani dhe Ramona Tullumani. Interpretimet e këtyre solistëve të njohur e bënë këtë mbrëmje të paharrueshme për adhuruesit e artit operistik. Kënga ukrainase - një romancë e kompozitorit Anatoly Kos-Anatolskyi, bazuar në poezinë e Ivan Frankos "Oh ti, vajzë" e interpretuar nga tenori lirik Mykhailo Malafiy - ishte veçanërisht prekëse. Vitaly Kovalchuk u dha dëgjuesve një pjesë të romancës ukrainase në dimensionin e saj më të mirë - romancën "Vetullat e zeza, sytë kafe" bazuar në poezinë e Kostyantyn Dumitrashko "Për sytë kafe".
Duke përshëndetur të ftuarit e Operës së Tiranës, ambasadori i Ukrainës, Volodymyr Shkurov vuri në dukje se në ditën e 207-të të luftës ruso-ukrainase, kjo ngjarje simbolizon mbështetjen e popullit shqiptar ndaj popullit të Ukrainës, i cili po lufton për pavarësinë e tij dhe të drejtën për një jetë të lirë. Volodymyr Shkurov gjithashtu shprehu mirënjohjen e tij të sinqertë për të gjithë ata që morën pjesë në organizimin e kësaj ngjarjeje të mrekullueshme. 
Ky koncert pohoi se në kohën kur flasin topat, edhe muzat kanë të drejta dhe dëshmojnë respektin e tyre për të bukurën, për ato vlera që na bashkojnë.
Në sallë, të pranishëm ishin ambasadorë dhe përfaqësues të trupit diplomatik, përfaqësues të klerit, komunitetit ukrainas, politikanë shqiptarë, figura kulturore, njohës të artit operistik etj. Të gjitha të ardhurat nga biletat e këtij koncerti  që u mbështet nga Bashkia Tiranë, do të shkojnë në ndihmë të rezistencës së popullit ukrahinas.
Duartrokitjet e gjata dhe një thirrje “Lavdi Ukrainës” dëshmuan edhe një herë mbështetjen e vazhdueshme të popullit shqiptar dhe solidaritetin e tij për Ukrainën në luftën e saj të shenjtë kundër pushtuesve rusë.