Twinkle Twinkle Festival

“Twinkle Twinkle Festival”- festival i këngës për fëmijë, u organizua në Tiranë në datën 21 shkurt 2022, në sallën e Teatrit Kombëtar Eksperimental pranë ArTurbina, me mbështetjen e Bashkisë Tiranë.
Edicioni i parë i këtij  festivali solli për publikun 15 këngë të reja për fëmijë të realizuara nga autorët Agim Rrëza, Ylli Kalaja, Aleksandër Peçi, Sokol Marsi, Shpëtim Saraçi, Kristi Bello, Elvis Peçi, Alban Dhamo, Aulon Naçi, Hamit Skilja, Dafina Smajli, Mirjan Sulovari, etj. të cilat erdhën për publikun nën interpretimet e ngrohta të fëmijëve.
Festivalit i dhanë larmi edhe të ftuarit specialë të cilët shfaqën talentin e tyre suprizues në këndim dhe kërcim.
Në përfundim të festivalit u ndanë 5 çmime kryesore nga juria e festivalit e përbërë nga pedagogë të kantos: Suzana Frashëri, Suzana Turku, Alma Strazimiri dhe Ema Kançi. Çmimet ishin: Çmimi i Parë; i Dytë; i Tretë; Performanca më e mirë dhe Zëri më i bukur. Juria gjithashtu vlerësoi me çmim  inkurajues të gjithë fëmijët pjesëmarrës duke i uruar të vazhdojnë plot energji në rrugën e gjatë e të bukur të muzikës dhe artit skenik.
Aktiviteti u prezantua dhe moderua nga Aurora Sina e cila i dha energjinë e nevojshme këtij festivali.
Gjatë shfaqjes dhe prezantimit të të rinjve, në monitorin e vendosur në skenë transmetoheshin imazhe të vizualizuara dhe të përshtatura me këngën që po performohej. 
Zhvillimi me sukses i këtij edicioni të parë i hap rrugën vijueshmërisë në vite të këtij festivali të këngës për fëmijë.