Kryetari i Bashkisë së Tiranës, Erion Veliaj, zhvilloi sot një takim me 24 administratorët e Njësive Administrative dhe punonjës të Policisë Bashkiake, për të dhënë disa porosi për marrjen e masave në nisje të vitit të ri shkollor. Në takimin me ta, kryebashkiaku theksoi nevojën për të respektuar masat e vendosura nga Bashkia e Tiranës për transportin, duke rikthyer oraret e kufizimit të qarkullimit të mjeteve të caktuara, për të lehtësuar trafikun në orët e para të mëngjesit, kur edhe nxënësit shkojnë në shkollë.
“Jemi duke vendosur sinjalistikën, barrierat nëpër shkolla, për rastet kur fëmijët dalin me nxitim në mëngjes, si dhe tabelat për vendndalimin e fugonave dhe makinave që sjellin fëmijët në shkollë. Megjithatë, dua t’ju informoj se edhe një koordinim me policinë e qarkullimit rrugor dhe Policinë Bashkiake, kemi rikthyer në fuqi oraret e qarkullimit, që do të thotë se nga ora 6-9 nuk lëviz asnjë mjet komercial në Tiranë. 100 mijë fëmijë janë më të rëndësishëm se 1 mijë fugona patatinash. Besoj se vitin e kaluar e dhamë një shembull të mirë dhe nuk ka më nevojë që t’i rikthehemi këtij argumenti”, tha Veliaj. Sipas tij, kush është penalizuar një vit më parë, tashmë e ka marrë mësimin për të gjitha këto kufizime të cilat janë të panegociueshme.
Ai kujtoi se nga llogaritjet e bëra një vit më parë, u vërtetua se fëmijët humbisnin 33 mijë orë mësimi në javë vetëm nga vonesat e trafikut, çka e bënin të pamundur kapjen e orës së parë të mësimit. Prandaj, shtoi Veliaj, nga e marta do të rinisë orari i ri i qarkullimit, si edhe të gjitha kufizimet e tjera. Përjashtim nga këto kufizime do të ketë vetëm për mjetet, të cilat po përdoren në 3 projektet strategjike të cilat janë pajisur me leje, si stadiumi “Qemal Stafa”, sheshi “Skënderbej” dhe Unaza e Vogël. Kryebashiaku i Tiranës solli në vëmendje edhe investimet e kryera gjatë këtij viti në infrastrukturën arsimore, të cilat do ta bëjnë edhe më të lehtë jetën për fëmijët dhe të rinjtë. Në këtë kuadër, veç ndërhyrjeve të pjeshme apo riparimeve në shumë shkolla, ka nisur puna edhe për krijimin e ambienteve tërësisht të reja.
“Kemi bërë disa ndërhyrje në mirëmbajtje, lyerje, zëvendësimin e xhamave të thyer, tualete, por në disa shkolla kemi bërë edhe rikonstruksion. Ndaj më vjen shumë mirë që sot nxënësit e “Qemal Stafës” shkojnë në një shkollë ultra moderne. është ndoshta një nga shkollat më të mira që kemi në Tiranë. Aty ka marrë fund makthi i mësimit me dy turne dhe tani me përfundimin edhe të palestrës së re, është një nga shkollat më dinjitoze në një rrugë kryesore hyrëse të Tiranës”, tha Veliaj. Një tjetër investim me rëndësi ishte ai në shkollën “Emin Duraku” apo edhe rikonstruksioni i shkollës “Sinan Tafaj”, që është drejt përfundimit. Investimi për Liceun “Jordan Misja” është cilësuar nga Veliaj po aq i rëndësishëm, po ashtu edhe puna që do të nisë në Shkollën e Baletit. Ai theksoi edhe punën që po bëhet për lirimin e konvikteve, ndërkohë që ish-banorëve të tyre u është ofruar si zgjidhje me strehimet sociale apo bonuset e qirave.
Kryebashkiaku Veliaj theksoi edhe projektin për ndërtimin e 20 shkollave të reja. Procesi nisi me shkollën “Hoxha Tahsin” në njësinë nr. 2 , shkollën “Betim Muço” në Kombinat dhe më tej do të vazhdojë me shkollën e re te Bregu i Lumit dhe shkollën Kosova. “Së shpejti nis puna për shkollën “Kosova”. Për këtë shkollë qeveria ka miratuar shpronësimin e asaj prone pas djegies, ndërsa shkolla do të rikthehet edhe më e madhe dhe më e bukur. Arsyeja përse kam insistuar që të ndodhë kështu, është edhe për të dhënë një leksion për këdo tjetër që i ka vënë syrin një prone publike, e djeg “pa dashje” për të ndryshuar destinacion, e për ta mbyllur me gjykatë. Shkolla “Kosova” heq një pjesë shumë të madhe të ngarkesës aty”, tha ai. Shkolla e muzikës “Servete Maçi” do të rindërtohet po ashtu nga e para, edhe më e madhe, me kushte më të mira, ndërsa gjatë vitit të dytë të manddatit do të vijojë puna për 17 shkollat e tjera.
Kryebashiaku iu rikthye edhe njëherë nisjes së punimeve në sheshin “Skënderbej” dhe masat e marra për devijimin e lëvizjes së automjeteve. Ai theksoi se po aq e rëndësishme sa puna në këtë projekt të nisur është edhe kultura qytetare për të mirëkuptuar nismat e ndërmarra. “Sheshi “Skënderbej”, nëse do të ishte bërë 5 vite më përpara, sot do të kishim një shesh spektakolar dhe nuk do ta kishim bërë këtë bisedë. Ne jemi i vetmi qytet pa një dhomë ndenje. Kemi një rrethrrotullim makinash, por nuk kemi një shesh kryesor, siç i ka hije një qyteti europian”, tha ai. Veliaj shtoi se këto investime të mëdha janë të rëndësishme sepse Bashkia e Tiranës nuk mund të mendojë vetëm për 18% të qytetarëve që kanë makina, por edhe për 82% të tjerët që lëvizin në qytet. Ai tha se ashtu si për këndin e lojërave te Liqeni, do të përballen me kundërshtime të forta për sheshin “Skënderbej”, por kjo nuk do ta pengojë punën e bashkisë.
“Pavarësisht se kundër projektit të sheshit do të ngrihet një koalicion, ju garantoj se rezultati do të jetë njësoj si me këndin e lojërave të Liqeni. Kur sheshi të ketë mbaruar, të gjithë do të kenë të njëjtën sjellje si lodrat, shumë zhurmë për asgjë”, tha ai. Veliaj informoi edhe për vendimin e qeverisë i cili i dha zgjidhje çështjes së ngërçit me Unazën e vogël. “Qeveria shqiptare miratoi shpronësimin e disa pronave mbrapa Hotel Tiranës. Kjo do të thotë që nyja e fundit që mbante ngërçin e Unazës së Vogël, e cila siç e dini, ka kohë që ka mbaruar, edhe pas prishjes së INSIG-ut, është zhvendosja e nënstacionit. Po bëjmë një koordinim me OSHEE, që të mos ketë problematika me energjinë elektrike”, përfundoi kryebashkiaku Veliaj.