Veliaj bën bashkë legjendat e Tiranës, Partizanit dhe Dinamos: “Kush e ka punë kryesore sportin, duhet të kishte bërë më shumë”

Emrat më të shquar të futbollit shqiptar që kanë bërë histori me fanellat e Partizanit, Tiranës dhe Dinamos u rikthyen dje në fushën e blertë, për të risjellë edhe njëherë emocionet e mëdha të derbeve të Kryeqytetit. Në aktivitetin e djeshëm të organizuar nga Bashkia e Tiranës dhe që bëri bashkë disa nga legjendat e futbollit kryeqytetas, Kryetari Veliaj siguroi se do të vijojë ta mbështesë sportin dhe sipas tij, shpërndarja e investimeve do të bëhet në bazë të rezultateve të arritura.

“Mezi pres që këtë vit, kur Tirana mban titullin e Kryeqytetit Europian të Rinisë, të shtojmë investimet në sport. Vërtet kemi caktuar një premio çdo vit - Tirana mori 150 mijë euro vjet sepse fitoi kampionatin - por, duke qenë se qyteti është rritur, edhe Dajti, Farka, Kashari e shumë skuadra të tjera meritojnë të mbështeten dhe ne do të investojmë në bazë të rezultateve që sjellin. Tirana është e të gjithëve! Taksa paguajnë të gjithë - skuadrat, dashamirësit apo edhe ata që nuk luajnë fare e nuk janë tifozë - e për sa kohë që është e të gjithëve, do duhet që skuadrat t’i shpërblejmë në bazë të kupave që sjellin, ashtu siç po bëjmë me Sport Klub Tiranën”, deklaroi Veliaj. 

Ai u shpreh se Bashkia e Tiranës është e hapur për të bashkëpunuar me të gjitha organizatat sportive. “Jemi shumë të hapur me të gjitha shoqatat. Ne do të bëjmë tonën, edhe pse sporti nuk është gjëja jonë kryesore dhe ndoshta, ata që e kanë punë kryesore sportin duhet të kishin bërë më shumë për Tiranën. Tirana është gjysma e popullsisë, është gjysma e ekonomisë dhe nuk mund të jetë bashkia e vetme që merret edhe me peshëngritjen, kërcimin së gjati, atletikën dhe futbollin. Por, ne do të bëjmë pjesën tonë dhe do e qajmë”, theksoi Veliaj.

Kreu i Bashkisë bëri të ditur se do të vijojë puna për rikthimin e terreneve sportive për t’ia rikthyer ato komunitetit. “Sapo hapëm “Fahrie Hotin”, kemi bërë një punë fantastike me fushën e Laprakës, që u desh ta shpronësonim e t’ia kthenim prapë djmeve dhe vajzave të Laprakës. Të njëjtën gjë po bëjnë edhe investimet private, me të cilat po bashkëpunojmë. Redi Jupi ka investuar këtu, kurse ne po ndihmojmë me rrugën, për të lidhur dritat apo ujin, e gjithë nevojat e tjera”, nënvizoi Veliaj. 

Gjergji Muzaka, drejtor i sporteve në Bashkinë Tiranë, bëri thirrje të rinjve që të punojnë shumë për të arritur ëndrrat e tyre. “Pavarësisht se në fushë kemi qenë shpeshherë kundërshtarë, gjithmonë jashtë fushe ju kam parë si një skuadër. Në qoftë se do më lejojnë fëmijët, kam një këshillë për ta: Sot jeni të vegjël dhe mbase ju duket pak e thjeshtë, por që të merresh me sport, të investohesh në sport, është si një filiz që e mbjell sot edhe duhen vite të tëra punë, vullnet dhe pasion që të arrish lart si këta djem”, nënvizoi Muzaka.

Kupa e turneut u fitua nga ekipi i Dinamos, ndërkohë vlerësime mori dhe Tirana dhe Partizani. Prej gjashtë vitesh, Bashkia e Tiranës ka nisur një fushatë për promovimin e aktiviteteve sportive në qytet, duke hapur të gjitha palestrat e shkollave, që mund të shfrytëzohen nga të rinjtë dhe komuniteti rreth shkollës. Një vëmendje e posaçme i është kushtuar dhe shtimit të terreneve sportive në të gjithë territorin.