Veliaj dhe Manastirliu në Arenën Kombëtare ndjekin vaksinimin e Policisë bashkiake

Falë numrit të lartë të vaksinave që po sigurohen çdo ditë e më shumë nga qeveria, procesi i vaksinimit në Shqipëri po ecën sipas skenarit më optimist të autoriteteve, atij të mbulimit të të gjithë popullatës deri në pranverën e vitit të ardhshëm. Kryetari i Bashkisë së Tiranës, Erion Veliaj, së bashku me ministren e Shëndetësisë, Ogerta Manastirliu asistuan sot në procesin e vaksinimit të një prej kategorive më të riskuara nga pandemia e Covid-19, punonjësve të policisë bashkiake në kryeqytet. 
“Jam shumë krenar për të gjithë mjekët, infermierët, deri tek vaksinatorja në fshatin më të largët! Është një punë heroike njerëzish, që ndoshta kanë stresin më të madh, por paguhen me 1/10 e rrogës së atyre që në momentin më të vështirë dhe në krizën më të madhe që po përballon vendi gjejnë momentin të sabotojnë,” tha Veliaj, duke vlerësuar nga ana tjetër edhe punonjësit e policisë që përveçse në vijën e parë të pandemisë u është dashur të përballen edhe me politikanë. 
“Policët bashkiakë, ashtu si dhe policët e shtetit janë ata që përballen me cfarëdo çudirash e problematika njerëzish dhe situatash që realisht prodhojnë stres. Ka politikanë që vijnë dhe rrihen me policët siç ka dhe politikanë që vijnë dhe shërojnë policinë. Ne kemi nevojë për ata që mbështesin dhe që shërojnë dhe jo për ata që rrahin edhe që dhunojnë policinë. Ne kemi respekt për uniformën, përfaqëson shtetin shqiptar pavarësisht kush është në pushtet. Politika që shëron është gjithmonë fituese mbi politikën që rreh, që dhunon dhe që shkatërron,” tha Veliaj. 
Ministrja Manastirliu nga ana e saj siguroi se procesi i vaksinimit po zgjeron hap pas hapi fashat dhe kategoritë që përfitojnë. “Ambicia jonë është të shkojmë drejt 500 mijë vaksinimeve deri në muajin maj, në mënyrë që të kemi përfunduar vaksinimin e popullatës deri pranverën e vitit të ardhshëm. Sigurisht kjo po bëhet e mundur falë gjithë përpjekjes së kryeministrit dhe të qeverisë për të sjellë vaksina në një kohë të shpejtë, për të qenë ndër të parët vende në rajon që i siguruan vaksinat dhe jo vetëm që ia kemi dalë të ndihmojmë grupet e riskuara, sikurse filluam në fillim me mjekët, infermierët e më tej me grupet e riskut, por përhapëm edhe fashën për vaksinimin masiv,” tha Manastirliu. 
Në radhët e Policia Bashkiake numërohen deri më tani më shumë se 9 mijë efektivë të vaksinuar, ose 70% e efektivëve në total.