Veliaj: Hapim një kapitull të ri për fshatin dhe zonat rurale; nesër prezantojmë tregun e ri agroushqimor, premtim i mbajtur

Kryetari i Bashkisë së Tiranës, Erion Veliaj ka deklaruar se ditën e nesërme do të prezantojë tregun e parë agroushqimor publik, i cili do të jetë në zonën e Farkës. Gjatë fjalës së mbajtur në mbledhjen e sotme të Këshillit Bashkiak, Veliaj tha se këto janë ditët më të mira për fshatin dhe zonat rurale, ku tha se janë ndërtuar edhe 19 shkolla të reja. 

“Sot për fshatrat e Tiranës janë ditët më të mira që ka pasur ndonjëherë, që pas çlirimit, dhe nesër do shikoni prezantimin e tregut agroushqimor në Farkë. Më në fund mbajmë dhe premtimin e fundit për fshatin, të paktën për këtë mandat, kur kishim premtuar edhe shkollat e reja që i realizuam të gjitha. Vetëm në Pezë kemi ndertuar 4 shkolla të reja. Kemi bërë gjithsej 19 shkolla në fshat, ndërkohë i fundit premtim ishte tregu agroushqimor. Kam një drojë që pavarësisht se ne e prezantojmë për herë të parë dhe inkurajojmë subjektet të vijnë, më rezulton që jemi thuajse 100% të prenotuar, pra edhe subjekte fermere dhe subjekte tregtare. Do të thotë që do hapim një kapitull të paimagjinueshëm për fshatin dhe për zonat rurale,” u shpreh Veliaj. 

Sa i takon investimeve në infrastrukturën rrugore, Veliaj tha: “Për fshatin, kemi angazhuar edhe në këtë buxhet 150 mijë katrorë rrugë të reja. Disa rrugë janë rrugë rurale, sipas parametrave që ka kodi rrugor, disa të tjera janë që lidhin me qytetin dhe sigurisht janë pak më të sofistikuara dhe më të shtrenjta por parimi është për të bërë 150 ndërhyrje në zonat rurale, me buxhetin dhe ndryshimet buxhetore që do kalojmë sot.”