Veliaj inspekton Pistën Olimpike të Atletikës në Parkun e Liqenit: Mbajtëm premtimin që i bëmë Luiza Gegës, një investim fantastik për sportistët e rinj

Pista Olimpike e vrapit dhe kërcimit është drejt përfundimit të punimeve për të pritur sportistët profesionistë në mes të Parkut të Liqenit të Tiranës. Pista me 6 korsi është realizuar sipas standardeve të atletikës dhe është në pritje të certifikimit për t’u përdorur edhe si hapësirë për aktivitete ndërkombëtare. 

Kryebashkiaku Erion Veliaj, i cili inspektoi punimet në Pistën Olimpike, u shpreh se Tirana po bën çdo përpjekje që edhe vitin e ardhshëm të jetë kryeqytet i Europës, këtë herë për Sportin, dhe se investime të tilla janë një pajë e vyer për evente që afrojnë të rinjtë me sportin dhe gjithashtu i shërbejnë edhe ekonomisë në kryeqytet. Po ashtu, ai kujtoi se kjo pistë është dhe një premtim i dhënë një prej kampioneve shqiptare si Luiza Gega. 

“Ky ka qenë një vit i jashtëzakonshëm për Tiranën, jo vetëm për faktin se jemi Kryeqyteti Europian i Rinisë, por edhe sepse u munduam që, përveç aktiviteteve rinore, të kemi edhe disa investime që do ngelen edhe kur të mbarojë ky titull. Kjo hapësirë është një prej këtyre investimeve që do ngelen edhe kur të mbarojë viti kalendarik i kryeqytetit të Rinisë. Një premtim që ia kam bërë publikisht Luiza Gegës. Tani më vjen mirë që jemi te Pista e Atletikës dhe ajo është duke u përgatitur për Kampionatin Europian të Atletikës në Mynih, ku shpresojmë që të dalë faqebardhë. Gjykoj që kemi bërë një investim fantastik,” tha ai. 

Kryetari i Bashkisë së Tiranës nuk la pa përmendur baltën e politikës që, sipas tij, si kudo, edhe në këtë investim, nuk i ka kursyer shpifjet. “Unë e di që në Tiranë nuk bëhen gjërat kollaj, politika është shumë toksike, të gjithë politikanët, ish-kryeministra, ish-presidentë, duan të bëhen të gjithë brigadierë komunale. Nuk u bë as gradaçelë, nuk u bë asnjë shkulje pemësh. Është ndoshta rasti i dytë, përveç pistës së Nike në Seattle, ku praktikisht natyra gërshetohet me atletikën,” u shpreh Veliaj. 

Kryebashkiaku nënvizoi se me këto investime, por edhe me mbështetjen që i bëhet sportistëve sot në vendin tonë, janë të gjitha kushtet për të krijuar edhe kampionë të rinj të cilët do ndjekin rrugën e suksesit të Izmirit dhe Luizës. “Ne kemi Izmirin dhe Luizën si etalonët e arritjeve tona në atletikë, por në fakt na duhet të fillojmë që tani përgatitjet me brezin e ri. Na duhet që në dallim nga ata që u rritën në kushte spartane, pa shpërblime dhe pa infrastrukturë, sot që shpërblimet janë bërë automatike për medaljet, na kanë ikur të gjithë alibitë pse nuk japim dot maksimumin. Duhet vetëm përkushtim dhe disiplinë, një gjë që secili e ka individualisht, pra trajneri dhe sportisti. Pjesa tjetër është zgjidhur nga shteti, si nga qeveria, si nga Bashkia,” përfundoi Veliaj. 

Në këtë pistë atletët mund të ushtrojnë disiplina të ndryshme të sportit të atletikës si 100 metra, kërcim së gjati, distancat e mesme, distancat e gjata, vrapim me pengesa, stafetat etj,.


Veliaj jep lajmin e mirë për investimet në sport: Hapim garën për transformimin e Pallatit të Sportit “Asllan Rusi” dhe stadiumit “Selman Stermasi” 


Kryetari i Bashkisë së Tiranës, Erion Veliaj, deklaroi se Pallati i Sportit “Asllan Rusi” dhe stadiumi “Selman Stermasi” do të jenë investimet e radhës për sportin. 

“Ne do të hapim disa gara për të transformuar hapësira jashtëzakonisht të çmuara sportive të qytetit tonë. Gara e parë do të jetë për Pallatin e Sportit “Asllan Rusi”. Nuk mund të kemi një hangar avionësh, që çfarë bie jashtë futet brenda, ashtu siç kishim një teatër prej tallashi, s’mund të kemi një pallat sporti prej kompensate. Pallati i Sportit duhet të jetë tamam një arenë . Siç kemi “Arena Kombëtare” për lojërat me këmbë, do të jetë dhe “Arena Kombëtare” për lojërat me dorë, volejbollin dhe për basketbollin. Nesër mund të përdoret edhe për koncerte, siç ndodh kudo në botë. Ne me një mini investim që kemi bërë tek Parku Olimpik te salla “Feti Borova”, i ka dhënë jetë qytetit. Imagjinoni të kemi një arenë profesioniste kombëtare, po sidomos në funksionon të qytetit të Tiranës tek “Asllan Rusi””, tha Veliaj, 

Kryetari i Bashkisë së Tiranës shtoi se “Selman Sermasi” nuk do jetë vetëm një stadium për futbollin, por do shërbejë edhe për atletët.  “Atje do të mundohemi të reflektojmë pak mbi mënyrën se si i kemi bërë gjërat në të kaluarën, ku futbollit i është dhënë 100% e vëmendjes. Aty kemi një mundësi që ta përdorim edhe për atletikën. Do ruajmë fushën e futbollit dhe do vendosim që në fillim në kriteret e garës edhe pjesën e atletikës. Do sigurohemi që siç “Arena Kombëtare” është kthyer në një “akupunkturë”, pra në një pineskë në “trupin” e qytetit që ka sjellë më shumë biznese, ka rritur vlerën e pronës në të gjithë këtë hapësirën buzë liqenit, te Korpusi, ashtu dhe “Selman Stermasi” mund të transformohet në një hapësirë fantastike me të njëjtën skemë siç funksionoi “Arena Kombëtare”, që me të gjithë kundërshtitë sot është një histori suksesi,” përfundoi Veliaj.