Shpërndaje
Qesaraka, Fresku dhe Dajti ishin ndalesa e radhës e kreu të Bashkisësë Tiranës, Erion Veliaj, në turin e tij në të 27 njësitë e kryeqytetit. Në takimin me stafin e njësisë administrative 12, ai kërkoi finalizimin dosjeve të tërmetit, si dhe ndërgjegjësimin e qytetarëve për të regjistruar të saktë adresën e banimit, që do të përkthehet më pas edhe në më shumë investime për zonën.
Gjatë takimit me komunitetin e kësaj zone, Veliaj tha se pas zgjidhjes së problemit të ujit të pijshëm, që ishte një kërkesë disavjeçare e banorëve, Bashkia e Tiranës do të nisë shumë shpejt punimet për rehabilitimin e rrugëve në këto zona. “I gjithë rrjeti i ujësjellësit është vendosur më në fund dhe Fresku është futur në rrjetin qendror të Ujësjellësit të Tiranës, duke u larguar nga puset dhe zgjidhjet provizore. Me të mbaruar faza e ngjeshjes së tokës, do të fillojmë me shtresat asfaltike dhe sinjalistikën. Atëherë mund të themi realisht që Fresku, Thesari, Qesaraka është integruar në Tiranë”, u shpreh Veliaj.
Lajmi tjetër i mirë nga kryebashkiaku ishte ndërtimi i shkollës së re, e cila do të ketë të integruar parashkollorin, 9-vjeçaren dhe të mesmen. “Sapo kemi nënshkruar kontratën dhe siç filluam te Njësia 8, për punë ditësh do të fillojmë kantierin te ish-SHIU (Shërbimi Informativ Ushtarak). Do të jetë një mega-kantier dhe një shkollë 10 mijë metra katrorë, 9-vjeçare dhe e mesme. Për prindërit është një lehtësi e jashtëzakonshme sepse që nga mosha 4-5 vjeç deri në 18-vjeç, fëmija nuk ka nevojë të largohet nga lagjja, nuk ka nevojë të harxhojë një orë në fugon vajtje-ardhje”, tha ai.
Duke folur nga zona e Freskut, kryebashkiaku, njëherësh edhe drejtues politik i PS për Tiranën, theksoi se ndryshe nga PD-ja, që e ka hallin te listat e kandidatëve për deputetë, socialistët flasin për listat e punëve. “Njerëzit nuk kanë nevojë për gangsterë dhe arrogantë, për njerëz që flasin si të fortë, që i kap euforia e pushtetit. Arsyeja pse PS-ja vazhdon të fitojë është sepse iu shërbejmë njerëzve me përulësi. Themi sa shtëpi të njerëzve hallexhinj që i humbën gjatë tërmetit do bëjmë sot? Kurse ata mendoja sa shtëpi dhe vila do shtojnë në bregdet apo tek kodrat e Tiranës. Kush prej demokratëve dhe atyre të LSI-së thonë Luli dhe Monika, o zot na jep fuqi që të ndihmojmë njerëzit sot? Njerëzve duhet t’ua shpjegojmë këtë. Edhe ata flasin për lista, edhe ne flasim për lista. Por ne flasim për listat e sa familjeve do ndihmojmë me shtëpitë e reja, me pagesat e dëmshpërblimeve të tërmetit”, deklaroi Veliaj.
Ai shtoi se opozita nuk ka asnjë alternativë për shqiptarët, pasi ata e kanë provuar kur e kishin pushtetin dhe nuk bënë asnjë punë. “Nëse do vinte ndonjë ofertë më e mirë se ne, nëse do vinin njerëz që nuk i njohim, që në CV-në e tyre nuk mbaron lista e punëve që kanë bërë, atëherë hallall e paçin, se nuk mund të jemi gjithmonë në qeveri. Por, kur ti shikon se kush po theret për listat e tyre, njerëz që ti i ke provuar në Ministri të Rendit dhe vranë 4 veta me plumba në mish, njerëz që i ke provuar si kryeministër dhe hodhën në erë një fshat të tërë dhe lanë gjithë ato familje të gjymtuara, njerëz që i ke provuar në ministri të Jashtme dhe falën detin, është tradhti! Njerëz që i ke provuar në Bashki, iu ngeci sahati dhe dy vjet nuk u dukën në Bashki; pra njerëz që kanë alergji nga njerëzit, ndërkohë që ne jemi komplet tjetër. Ne shohim tek çdo njeri potencial për të komunikuar, për të ecur përpara”, tha kryebashkiaku.
Veliaj nënvizoi se mandati i tretë për PS-në është një kërkesë për të vazhduar punët e mira të nisura dhe për t’u shërbyer njerëzve.Në turin e tij nëLagjen 12, ai zhvilloi takime edhe me biznesin e zonës, ku bisedoi me ta në lidhje me situatën gjatë pandemisë dhe politikat e reja lehtësuese për ta.
Shpërndaje