Vijojnë dëgjesat publike me inxhinierë dhe ekspertë, Bashkia Tiranë shqyrton dosjet për pallatet e dëmtuara nga tërmeti në Njësitë 1, 2, 6 dhe 14

Bashkia e Tiranës vijoi edhe sot dëgjesat me inxhinierë për pallatet e dëmtuara nga tërmeti në Njësitë 1, 2, 6 dhe 14, ku qytetarët patën mundësi të ndjekin analizën e thelluar të ekspertëve, nëse ato ndërtesa duhen prishur, për t’u rindërtuar, apo rikonstruktuar.

Nënkryetari i Bashkisë së Tiranës, Arbjan Mazniku theksoi se vendimet për këto godina do të merren vetëm nga ekspertët, për të garantuar jetën e qytetarëve. “Po sigurohemi që, nga ana inxhinierike, çdo struktuturë të këtë kaluar vlerësimin më të detajuar të mundshëm, por edhe vlerësimi për rindërtimin apo riparimin të jetë i bazuar në fjalën e inxhinerëve dhe të Institutit të Ndërtimit, në mënyrë që më pas t’i hapim rrugë procesit të mëtejshëm, që është prishja e atyre objekteve, të cilat do të vlerësohen se nuk mund të qëndrojnë më. Kështu, do t’i hapim rrugë ndërtimit të objekteve të reja, ku do të strehohen banorët e prekur nga tërmeti, ose në rastet kur nga ana e inxhinierëve është vlerësuar nevoja për riparim strukturor, të kemi mundësinë të fillojmë riparimin e tyre”, tha ai.

Mazniku siguroi të gjitha familjet e dëmtuara se bazuar në shkallën e dëmit që kanë banesat e tyre, ose do të futen në një shtëpi të re ose do të nisë menjëherë puna për riparimin e tyre. “Kemi filluar ndërtimin e objekteve individuale. Për 200 ndërtesat e para kanë filluar punimet dhe në një periudhë të shkurtër kohe do të jenë të gatshme për banorët. 150 të tjera u miratuan nga Këshilli Bashkiak para pak ditësh, dhe sërish në një kohë shumë të shkurtër do të fillojmë proçesin e ndërtimit. Ky proces do të vijojë hap pas hapi me shqyrtimin e të gjitha aplikimeve, derisa çdo familje e cila është dëmtuar të përfitojë një shtëpi të re”, tha Mazniku.

Më konkretisht nga analiza e ekspertëve të ndërtimit rezultoi se:

"PALLATI 5", RRUGA "MARSEL KASEMI", do të duhet të demolohet dhe të ndërtohet nga e para, pasi kostoja e ndërhyrjes arrin në 72 % të vlerës nëse do bëhej i ri.

"PALLATI 11/1", RRUGA "VATH KORESHI", do të duhet të demolohet dhe të ndërtohet nga e para, pasi kostoja e ndërhyrjes arrin në 77 % të vlerës nëse do bëhej i ri.
 
"PALLATI 2, SHKALLA 2", RRUGA "XHORXH W.BUSH", do të duhet të ripërforcohet dhe rikonstruktohet.

"PALLATI 2, SHKALLA 5", RRUGA "HASAN SUFA", do të duhet të ripërforcohet dhe rikonstruktohet.

"PALLATI 104/6", RRUGA "ALI DEMI", do të duhet të demolohet dhe të ndërtohet nga e para, pasi kostoja e ndërhyrjes arrin në 90 % të vlerës nëse do bëhej i ri.

" PALLATI 5/1 ", RRUGA “TODI SHKURTI", do të duhet të demolohet dhe të ndërtohet nga e para, pasi kostoja e ndërhyrjes arrin në 73 % të vlerës nëse do bëhej i ri.