Zhvillohet dëgjesa e dytë publike me inxhinierët për pallatet e dëmtuara nga tërmeti

Bashkia e Tiranës zhvilloi sot seancën e dytë të dëgjesës me inxhinierë dhe ekspertë, të cilët kanë kryer vlerësimet përkatëse për pallatet e dëmtuara nga tërmeti në Kombinat dhe në zonën e Astirit, e në bazë të përfundimit të raportit të tyre do të merret vendimi për prishjen ose jo. Nga ekspertiza rezulton se “PALLATI 145”, rruga “SOKRAT MOSKO”, “PALLATI 163/1 & 163/3”, rruga “ALI KELMENDI”, “PALLATI 155/1”, rruga “LLAMBI BONATA”, “PALLATI 152/3”, rruga “HAKI STERMILLI”, “PALLATI 131”, rruga “LLAMBI BONATA”, “PALLATI 159”, rruga “LLAZI MIHO”, “PALLATI 141”, rruga “SOKRAT MOSKO”, “PALLATI 154”, rruga “SOKRAT MOSKO”, duhet të rindërtohen. Kurse “PALLATI 1”, rruga “3 DËSHMORËT” do të përforcohet.

Nga salla e Këshillit Bashkiak, kryebashkiaku Erion Veliaj sqaroi se për ato ndërtesa publike apo private, ku kostoja e riparimit kalon 70% të vlerës, do të ndërtohen nga e para. “Një vendim i marrë me vonesë ose i pa marrë fare shkakton më shumë dhimbje. Këtë agoni e ndërpresim sot për 9 pallate. Janë 8 pallate në Kombinat dhe një në zonën e Astirit. Siç thotë ligji: Vendimi i bashkisë për prishjen e detyruar të ndërtesave në pronësi private apo publike, pra ato raste kur ndërtesa është e dëmtuar nga fatkeqësia natyrore, kur nuk mund të riparohet ose riparimi kushton më shumë se 70% e kostos së ndërtimit nga e para, merret nëpërmjet këtij procesi transparent dhe bazuar në parashikimet e aktit normativ nr. 9, datë 16/12/2019”, tha Veliaj.

Ai siguroi të gjithë banorët se dy lagjet e reja në Kombinat dhe në Kinostudio do të jenë ndër më të bukurat. “Unë jam i bindur se lagjet e bukura të Kombinatit dhe Kinostudios do të ngrihen përsëri, por më të mira se dje dhe ndoshta edhe më e mirë se sot, me investimet moderne që duam të bëjmë aty, për t’u siguruar që ora 03:54 e tragjedisë tonë të 26 Nëntorit, të kthehet në një orë mundësie, që duhet kapur për mundësi të reja. Jemi sot për t’i marrë këto vendime pa humbur kohë. Ashtu siç morëm vendimet për të dëmshpërblyer dhe rindërtuar tërmetin e shtatorit, apo për 3000 pagesat e para të nëntorit - besoj shumë shpejt do të kemi edhe 3000 të dytat - ashtu do të marrim vendimet edhe për ato ndërtesa ose ngrehina, për t’i thënë lamtumirë një epoke që iku sepse duhet të ecim përpara”, theksoi Veliaj. Kryebashkiaku shtoi se Bashkia e Tiranës do të vazhdojë të kryejë të gjitha pagesat për bonusin e qirasë, në mënyrë që askush të mos mbetet pa një strehë deri në momentin që do marrë çelësin për të hyrë në apartamentin e ri, po në të njëjtën zonë.

Veliaj sqaroi edhe çështjen e bibliotekës së Njësisë Administrative 6, e cila vazhdon shërbimin normalisht pranë godinës së Njësisë Administrative, pasi godina e vjetër u dëmtua në nëntor nga tërmeti. Nga ana e Bashkisë së Tiranës janë marrë të gjitha masat për transferimin e materialeve, si libra, tavolina, rafte apo edhe orenditë e tjera, të cilat janë pjesë e inventarit të kësaj biblioteke. “Mjafton të shikosh bibliotekat si “Misto Treska”, ose biblioteka “Musine Kokalari” apo “Hamit Beqja”, përfshirë edhe bibliotekën e Kombinatit, që libri rifilloi të lexohej në Tiranë kur erdhi administrata e re. Për të sqaruar nusen e Çoles dhe gjithë gjobaxhinjtë e tjerë, kur bashkia blen rafte librash, libra apo tavolina studimi, institucioni i bibliotekës nuk është adresa fizike. Në momentin kur vendosim të prishim pallatin, bibliotekën do ta çojmë ose tek njësia administrative ose do të marrim një hapësirë tjetër me qira. Ndaj, për të sqaruar edhe nusen e Çoles dhe gjithë të tjerët, këtu s’ka trafikantë që i vë dot gjobë kryetarit të bashkisë, jo më aspirantët për bashkinë e ardhshme”, nënvizoi Veliaj.

Ndërkaq, kryeqyteti është kthyer këtë verë në një kantier ndërtimi. Veliaj tha se ka nisur puna për kolektorin e ri në rrugën e Durrësit. “Është një investim i jashtëzakonshëm që po bëjmë në Rrugën e “Durrësit”. Kemi mbaruar kolektorët në rrugën “Dritan Hoxha”, në rrugën “Don Bosko”, ndërkohë duhet të bëjmë një lidhje midis qendrës së Tiranës, ku vijnë të gjithë kolektorët nga Rruga e “Elbasanit”, Rruga e “Dibrës” në Sheshin “Skënderbej”, për segmentin e fundit që na ka mbetur”, tha ai.

Ndërkaq, kryetari i Bashkisë së Tiranës, Erion Veliaj dha lajmin e mirë për shpërblimin e ekipit kampion të Tiranës. Përfitues nga fondi i akorduar nga Bashkia e Tiranës nuk do të jenë vetëm 11 lojtarët që zbresin në fushë, por i gjithë ekipi i Tiranës, të cilët i bënë kryeqytetit dhuratën më të bukur në këtë 100-vjetor të themelimit të klubit, por edhe të shpalljes kryeqytet.

“Jam jashtëzakonisht i lumtur që kupa e Kampionatit qëndron në Tiranë pas Partizanit vjet. Kjo është arsyeja pse i kam propozuar Këshillit Bashkiak që të japim një shpërblim 150 milionë lekë, që është ndoshta shpërblimi më i madh i dhënë ndonjëherë nga një Bashki për një trofe dhe për ekipin e futbollit ku Bashkia në fjalë është aksionere. Ky shpërblim do të shkojë për të gjithë skuadrën, jo vetëm për ata 11 që zbresin në fushë. Pavarësisht se është një ekip kryesor që del në fushë, ky është vendimi i parë me një urim të përzemërt për Tiranën. E di që shumë veta thoshin dje pse s’ka bërë urim Lali Eri si ca politikanë të tjerë, por politikanët e tjerë ndoshta fjalët i kanë të tepërta, kur flasim ne të bashkisë, urimet nuk bëhen me duart bosh, por me duart plot, teksa bëmë edhe një analizë me klubin se çfarë do të ishte një shpërblim i arsyeshëm”, theksoi Veliaj.