Planet Strategjike Bashkia Tiranë

Misioni i Bashkisë Tiranë është sigurimi i një qeverisje të drejtë, efikase me qytetarët duke njohur dhe respektuar ekzistencën e identiteteve dhe vlerave të ndryshme të komunitetit, respektimin e të drejtave dhe lirive themelore të tyre, duke mbështetur dhe siguruar mirëqënie dhe duke garantuar standarte bashkëkohore në ofrimin e shërbimeve, mjedis të shëndetshëm, vlera të larta të bashkëjetesës komunitare dhe një ndjenjë të pronësisë/zotërimit mes banorëve mbi të mirat publike.

Për të përmbushur këtë mision Bashkia Tiranë, Drejtoria e Planifikimit Strategjik dhe Jetësimit të Prioriteteve harton cdo vit Planin Strategjik të Bashkisë Tiranë (PSBT), një dokument i cili përmban prioritetet dhe objektivat e institucionit, të detajuara dhe grupuara sipas drejtorive të përgjithshme. Për çdo drejtori të përgjithshme janë përcaktuar objektivat dhe projektet apo aktivitetet që do të zhvillohen nga strukturat pjesë të aparatit të Bashkisë Tiranë. Bazuar tek funksionet e çdo drejtorie janë përcaktuar njësitë përgjëgjëse dhe njësitë mbështetëse për realizimin e këtij plani.

PSBT  përcakton në mënyrë të detajuar të gjitha veprimet të cilat duhet të ndërmerren për të arritur objektivat dhe prioritetet strategjike. PSBT përpilohet në bazë të: (i) Funksioneve, kompetencave dhe detyrave të përcaktuara nga kuadri ligjor dhe rregullorja e Bashkisë Tiranë, (ii) Prioriteteve dhe objektivave të përcaktuara nga Strategjia e Zhvillimit të Qëndrueshëm të Bashkisë Tiranë 2018 – 2022, (iii) Platformës socio-ekonomike të Kryetarit të Bashkisë, (iv) Buxhetit të miratuar në Këshill Bashkiak për vitin përkatës dhe (v) Planeve vjetore të strukturave të bashkisë. Hartimi dhe zbatimi i këtij plani do të japë një kontribut jo vetëm në përmbushjen e prioriteteve dhe synimeve që ka Bashkia Tiranë për vitin, por gjithashtu do të lehtësojë bashkëpunimin mes strukturave, si edhe do të përmirësojë procesin e transparencës me qytetarët, të cilët janë përfitues të drejtpërdrejtë nga përmbushja e këtyre objektivave.