Shpërndaje
Hartimi i Programit Buxhetor Afatmesëm (PBA), mbështetet në ligjin nr. 9936, datë 26.06.2008 për “Menaxhimin e sistemit buxhetor në Republikën e Shqipërisë” dhe në Udhëzimet e Ministrisë së Financave për përgatitjen e buxhetit vendor. Përgatitja e buxhetit vjetor është pjesë përbërëse e procesit të përgatitjes së PBA-së, kështu buxheti vjetor është viti i parë i PBA-së.
Programi Buxhetor Afatmesëm i Bashkisë së Tiranës është hartuar në bazë të programeve të zhvillimit të qytetit, të cilat lidhen me funksionet respektive të pushtetit vendor të përcaktuara në kuadrin ligjor. Objektivat e çdo programi janë përcaktuar nga Njësitë Shpenzuese të përfshira, në përputhje me funksionet dhe qëllimet përkatëse.
Baza mbi të cilën janë përcaktuar sektorët parësorë të zhvillimit dhe identifikimit të prioriteteve të shpërndarjes së burimeve për periudhën 2016-2018 janë kërkesat e qytetarëve, të shprehura përmes diskutimeve publike me qytetarët e të 24 njësive administrative dhe programi qeverisës i Kryetarit të Bashkisë për vitet 2015-2019.
Ky projekt-buxhet bazohet në vizionin tonë për Tiranën e së ardhmes, e cila para së gjithash duhet të jetë një qytet i jetueshëm, me infrastrukturë moderne e transport publik cilësor, me shërbime efikase e cilësore, me mundësi investimi për sipërmarrësit, me një jetë kulturore të larmishme e me hapësira të dedikuara për fëmijët, të moshuarit, këmbësorët e çiklistët. Ne besojmë se nën qytetin e keqmenaxhuar për 4 vite me rradhë, fshihet një potencial i jashtëzakonshëm ekonomik, social e kulturor. Mundësitë e arritjes së këtij potenciali për zhvillim bëhën edhe më të mëdha me ndarjen e re territoriale, e cila duke e zgjeruar Tiranën me 13 njësi të reja, do t’i japë qytetit hapësirë për të marrë frymë e për t’u zhvilluar edhe më tej.
Buxheti afatmesëm 2016-2018 parashikon investime në projekte të mëdha si Zgjatimi i Bulevardit të Tiranës, Unaza e Madhe, Pazari i Ri, Parku Zoologjik dhe Terminali i Autobuzëve.
Një nga risitë më të mëdha që do të sjellë viti i ardhshëm do të jetë edhe Plani i Përgjithshëm Vendor – Tirana 2030, i cili do të përcaktojë se si do të duket Tirana e së ardhmes. Në ndryshim nga planet vendore të mëparshme, ky plan nuk do të bazohet vetëm mbi proceset e zhvillimit të qëndrueshëm urban, por do të trajtojë edhe çështjet e transportit dhe lëvizshmërisë, zhvillimin ekonomik, infrastrukturën, menaxhimin e aseteve natyrore dhe ringritjn sociale.
Shkarko: Programi Buxhetor Afatmesëm 2016 - 2018
Shpërndaje