PROJEKTI “APPS CHALLENGE – TIRANA”

Rreth Projektit

PROJEKTI “APPS CHALLENGE – TIRANA” Thirrja II, është projekti më i ri i internshipit, miratuar me Vendimin nr.13 datë 05.02.2020, të Këshillit Bashkiak Tiranë.

Qëllimi i projektit “Apps Challenge-Tirana” është që të rinj, deri në moshën 25 vjeç, në fillim të karrierës së tyre profesionale, të cilët janë duke ndjekur ose kanë jo më shumë se dy vjet që kanë përfunduar studimet e nivelit Bachelor, Master Profesional ose Master Shkencor, në fusha studimi: shkenca kompjuterike, teknologji informacioni dhe komunikimi, informatikë ekonomike, inxhinieri matematike dhe informatike, të ngjashme, në Institucionet e Arsimit të Lartë publike ose private, brenda ose jashtë vendit, të angazhohen në praktikë dhe do të fitojnë një eksperiencë pune për 4 muaj në Bashkinë Tiranë.

Afati i aplikimit për projektin është deri në datën 04 tetor 2021.

Për të kryer internshipin, 12 (dymbëdhjetë) të rinj fitues do të përzgjidhen nëpërmjet procedurës së konkurrimit. Pas përzgjedhjes, do të punojnë në 3 (tre) Skuadra Pune, për të krijuar 3 (tre) aplikacione. Duke bashkëpunuar nga afër me stafin e Drejtorisë së Përgjithshme të Teknologjisë së Informacionit dhe Statistikave, pranë Bashkisë Tiranë, ata do të realizojnë dhe përfundojnë praktikën 4 mujore. 

Në përfundim të praktikës, secila Skuadër Pune dorëzon aplikacionin mobile dhe në bashkëpunim me Grupin Mbikqyrës bëjnë të mundur vendosjen e tyre në dyqanin online respektiv për aplikacionet Android dhe iOS.

Praktikantëve fitues do ti akordohet një çmim individual bruto, prej 41,666 lekësh si edhe një çmim secilës prej 3 skuadrave të punës sipas renditjes përfundimtare:
•    për vendin e parë çmimi prej 110,000.00 lekë;
•    për vendin e dytë çmimi prej 90,000.00 lekë;
•    për vendin e tretë çmimi prej 80,000.00 lekë;

Për informacion të mëtejshëm rreth mënyrës së aplikimit, aplikantët mund të dërgojnë një kërkesë për informacion në adresën elektronike: [email protected]

Fazat e projektit

Aplikimi
Objektivi i thirrjes për paraqitjen e koncept-idesë për aplikacion mobile, është të mundësojë një proces transparent për përzgjedhjen e 12 të rinjve më të talentuar të cilët do të angazhohen në praktikë pune gjatë një periudhe 4 mujore, duke punuar nga afër me stafin e Bashkisë Tiranë, për të dorëzuar një aplikacion mobile i cili do të vendoset në App store respektive për aplikacionet Android dhe iOS.

Faza 1: - Paraseleksionimi
Pas përfundimit të periudhës për dorëzimin e dokumentacionit dhe koncept-idesë për aplikacionin mobile, Sekretariati do të verifikojë: 
1.    Plotësimin e kërkesave administrative për pjesëmarrjen në këtë projekt (respektimin e kërkesave për përmbajtjen, mënyrën e dorëzimit, afatin e dorëzimit të koncept-idesë dhe dokumentacionit të kërkuar nga ana e aplikantit). 
2.    Kriteret e vlefshmërisë së aplikimit (të dhënat e aplikantit, mosha e aplikantit, fusha e studimit, adresa etj.).

Faza 2: - Vlerësimi i koncept-ideve për aplikacion mobile
Pas përfundimit të fazës së paraseleksionimit,  të gjitha koncept-idetë për aplikacion mobile do të vlerësohen nga Ekipi Teknik i Vlerësimit të Aplikacionit Mobile (ETVAM) i cili brenda 5 ditëve do të vlerësojë këto aspekte: 

•    origjinalitetin e idesë; 
•    zgjidhja që ofron aplikacioni për një problem të identifikuar; 
•    përshkrimi i prototipit; 
•    analiza e konkurrentëve

Aplikantët të cilët mbledhin mbi 50 % të pikëve të kësaj faze (2), kualifikohen nga ETVAM për të vijuar më tej konkurrimin, për fitimin e internshipit në Bashkinë Tiranë. aplikantët që nuk janë kualifikuar në këtë fazë, kanë të drejtë të ankimojnë brenda 3 ditëve rezultatin e shpallur, pranë Komisionit Ad Hoc.  Në përfundim të fazës ankimore, aplikantët e kualifikuar, brenda 10 ditëve përgatisin skicat e aplikacionit për fazën 3.                                                                              

Faza 3: Vlerësimi i skicave dhe vlerësimi paraprak i fizibilitetit teknik (realizueshmërisë së aplikacionit)
Të gjithë aplikantët fitues të fazës 2, prezantojnë modelet/skicat e aplikacioneve sipas funksionaliteteve dhe vlerësimin paraprak të fizibilitetit teknik.

ETVAM vlerëson konkurrentët dhe harton një raport për ta, sipas pikëve të marra (duke nisur nga konkurrenti me më shumë pikë) për: koncept-idenë + skicat + vlerësimin e fizibilitetit teknik të aplikacionit. Raporti i bëhet me dije Bordit Drejtues dhe i njoftohet konkurrentëve, të cilët nëse kanë ankesa për vlerësimin gjatë fazës 3, do të kryhet rivlerësim dhe do të hartohet raporti i rishikuar me renditjen jopërfundimtare, pasi konkurrentët kanë edhe një mundësi ankimimi pranë Bordit Drejtues. 
Pas përfundimit të afateve të akimimeve të përcaktuara në fazën 3, bëhet renditja përfundimtare e konkurrentëve nga ana e Bordit Drejtues. Ky rezultat bëhet publik në faqen zyrtare të Bashkisë Tiranë.
 

Faza 4: Përgatitja dhe dorëzimi i prototipit për 3 (tre) aplikacione mobile
Pas shpalljes së fituesve nga ana e Bordit Drejtues, brenda 5 (pesë) ditëve Grupi Mbikqyrës, në konsultim me 2 (dy) eskpertë të pavarur, i propozojnë për miratim po këtij Bordi, zhvillimin e mëtejshëm të 3 (tre) aplikacioneve mobile, duke përzgjedhur nga propozimet fituese aplikacionet të cilat janë më të realizueshme nga ana teknike dhe kanë interes të lartë për Bashkinë Tiranë.

Bordi Drejtues shpreh miratimin brenda 3 (tre) ditëve pune, për të 3 (tre) aplikacionet mbi të cilat do të vijojë puna, deri në zhvillimin e plotë të tyre.  Grupi Mbikqyrës organizon 12 praktikantët (intern) në 3 skuadra pune (4 intern /skuadër) dhe i udhëzon ata për krijimin e një prototipi për secilin aplikacion, deri në realizimin e prototipeve.

Faza 5: Zhvillimi, dizenjimi dhe testimi i 3 (tre) aplikacioneve mobile
Gjatë muajit të dytë dhe të tretë, të internshipit do të vijojë puna për zhvillimin, dizajnin dhe testimin e 3 (tre) aplikacioneve mobile. Gjatë kësaj periudhe Grupi Mbikqyrës dhe Skuadrat e Punës punojnë së bashku për zhvillimin e plotë të 3 (tre) aplikacioneve dhe testimin e tyre.

Faza 6: Vendosja e 3 (tre) aplikacioneve në App stores (Android dhe iOS) dhe dhënia e çmimeve
Në përfundim të muajit të katër të praktikës Skuadrat e Punës dorëzojnë 3 aplikacionet mobile dhe në bashkëpunim me Grupin Mbikqyrës bëjnë të mundur vendosjen e tyre në App store respektive për aplikacionet Android dhe iOS.
Bordi Drejtues shpall fituesit me vendim dhe akordon çmimet individuale dhe çmimet për skuadër gjatë aktivitetit përmbyllës të projektit.
Rezultati dhe dhënia e çmimeve bëhen publike në faqen zyrtare të internetit të Bashkisë Tiranë.

Koncept- Ideja

Përmbajtja e Koncept- Idesë
• Aplikimet duhet të kompletohen në gjuhën shqipe duke përdorur Formën A të paraqitjes së koncept-ideve të dhënë në Aneksin 1. Bashkia Tiranë nuk do të pranojë asnjë aplikim i cili do të dorëzohet në format tjetër nga ai i përcaktuar në Aneksin 1. 
• Koncept-idetë me shkrim dore nuk pranohen. 
• Vlerësimi i koncept ideve do të bazohet vetëm në informacionin i cili jepet në mënyrë eksplicite në Formën për Koncept-Ide.
 

Dorëzimi i Koncept- Idesë
• Aplikantët duhet të plotësojnë Formën (A) për koncept-ide dhe ta dërgojnë në zarf të mbyllur me postë si vijon: 
    - Një Koncept-Ide orgjinale (e detyrueshme) 
    - Dy kopje shtesë në formatin A4 (e detyrueshme)
    - Fotokopje e Kartës së Identitetit 
    - Curriculum Vitae (CV) 
    - Vërtetim për ndjekjen ose përfundimin e studimeve të larta ose fotokopje e diplomës së studimeve të larta.

• Zarfi duhet të përmbajë shënimin: 
    - Aplikim për Projektin “Apps Challenge Tirana” 
    - Emri dhe adresa e aplikantit 
    - “Mos të hapet para fazës së paraseleksionimit”
• Dokumentat e kërkuara duhet që të dorëzohen në një zarf të mbyllur në adresën e mëposhtme: 
    Bashkia Tiranë 
    Sheshi “Skënderbej” 
    Nd.2, Kodi Postar 1001 
    Tiranë, Shqipëri 
    Tel:+355 4 228655 
    www.tirana.al 
• Koncept-Idetë e dorëzuara në forma të tjera ose në adresa të tjera nuk do të pranohen.

Afati për dorëzimin e Koncept- Idesë
• Afati i aplikimit është 04 tetor 2021. 
• Çdo koncept- ide e dërguar pas afatit skualifikohet.

Vlefshmëria e Koncept- Idesë
• Për informacion të mëtejshëm rreth mënyrës së aplikimit, aplikantët mund të dërgojnë një kërkesë për informacion në adresën elektronike: [email protected].            
 

Dokumentacioni i kërkuar nga ana e aplikantit
• Koncept-ideja për aplikacionin sipas Formës (A) 
• Fotokopje e Kartës së Identitetit 
• Curriculum Vitae (CV) 
• Vërtetim për ndjekjen ose përfundimin e studimeve të larta ose fotokopje e diplomës së studimeve të larta.

Çfarë duhet të përfshijë Koncept- Ideja
• Datën e aplikimit; 
• Të dhënat e aplikantit (emri/mbiemri i aplikantit, datëlindja, fusha e studimit, adresa, adresa e -mail, numër tel/cel); 
• Ideja pëtr aplikacion; 
• Deklaratën e problemit;
• Zgjidhja; 
• Prototipi i Përdoruesit;
• Analiza e Konkurentëve

Pyetje të shpeshta

1. Çfarë mund të përfitoni nga ky projekt?
– Duke marrë pjesë në këtë projekt ju do të përfitoni:
• 4 muaj eksperiencë pune
• Aftësi në fushën e programimit.
• Aftësi në krijimin e aplikacioneve mobile.
• Aftësi të reja teknike.
• Aftësi ndërpersonale (soft skills).
• Mundësi për krijimin e një rrjeti kontaktesh me profesionistë të fushës.

2. A mund të aplikoni me më shumë se një ide?
– Një aplikant mund të konkurrojë jo më shumë se me dy koncept–ide për aplikacion mobile.

3. Si do ta përfitoni çmimin?
– Pas shpalljes fitues, ju do të paraqisni dokumentacionin e mëposhtëm:
• Kopje të kartës së identitetit
• Vërtetim origjinal për llogarinë bankare në lek
– 100 % e çmimit do të dorëzohet në përfundim të afatit 4 mujor të internshipit pas dorëzimit të propozimit të plotë të prototipit të aplikacionit.
– Në rast se ju largoheni me kërkesë individuale gjatë kohës së kryerjes së internshipit ose në rast se nuk dorëzoni prototipin përfundimtar do të humbisni të drejtën e përfitimit të çmimit, por do të pajiseni me një vërtetim për kryerjen e Internshipit.

Formularët

Më poshtë mund të shkarkoni formën e aplikimit.
Shkarkoni këtu formularin e aplikimit për koncept ide – Forma A