Bërzhitë

Vështrim i Përgjithshëm

Bërzhita ndodhet 16 km në juglindje të kryeqytetit. Ajo shtrihet në dy anët e rrugës nacionale Tiranë – Elbasan.
Relievi i Bërzhitës përbëhet nga dy zona malore dhe një luginë ku shtrihen të dymbëdhjetë fshatrat e saj. Relievi është i larmishëm, kryesisht kodrinor, por nuk mungojnë fushat, malet dhe luginat. 
Bërzhita karakterizohet nga ajri i pastër dhe i freskët, nga bukuria e fushave dhe gjelbërimi i luleve, nga kodrat e veshura me shkurre mesdhetare, nga uji i kaltër i lumit Erzen dhe nga bukuria e freskia e burimit të Skoranës.
 

Histori

Zbulimet e bëra në Shpellën e Zezë (Pëllumbas) dëshmojnë që kjo zonë ka qenë e populluar që nga paleoliti e deri në mesjetën e hershme. Ndër gjetjet e para dhe me vlerë të veçantë janë disa fragmente stralli, që i përkasin paleolitit të vonshëm, disa fragmente të enëve prej balte, nga të cilat më të hershmet i përkasin neolitit (7000 – 3000 vjet p.e.s) dhe gjetje të epokës së bronzit dhe të hekurit ( afërsisht 2000-500 vjet p.e.s.).

Burime të shkruara thonë se Kllojka ashtu sikurse dhe Persqopi kanë pasur një qytetërim që prej 2000 vjetësh. Emrat Ibë, Bërzhitë, Dobresh flasin për një ndikim të qytetërimit sllav. Po kështu dhe ullinjtë e kultivuar prej shekujsh që gjenden sipër në kodra vërtetojnë se kjo trevë është e banuar që në lashtësi.

Ekonomi dhe mjedis

Zona e Bërzhitës ka potenciale prodhuese dhe asete të shumta. Zhvillimi ekonomik mbështet tek bujqësia, blegtoria, frutikultura dhe ullishtat pasi dhe pozita e mirë gjeografike e kombinimit të malit dhe fushës e favorizon këtë gjë.  

Prodhimi më intensiv bujqësor realizohet në zonën fushore përgjatë luginës së lumit Erzen, ku më tepër se gjysma e sipërfaqes është tokë pjellore dhe pjesërisht nën ujë. Prodhimi i perimeve dhe drufrutorëve zë një vend të rëndësishëm në prodhimin bujqësor.

Blegtoria shihet si një pikë e fortë e zhvillimit ekonomik, pasi territori ka shumë kullota dhe meqenëse Bërzhita ndodhet afër me kryeqytetin, ofron çmime shumë të mira në treg. 

Ekzistenca e biznesit të restoranteve me gatime tradicionale është një tjetër aset për zhvillimin ekonomik, pasi garanton një treg që edhe pse të vogël, të sigurt për shitjen e prodhimeve të zonës. 

Territori i Bërzhitës përshkohet nga lumi Erzen dhe ai i Murdharit, si dhe nga disa përrenj të vegjël e të përkohshëm. Pellgjet ujëmbledhëse të këtyre lumenjve nuk janë të mëdhenj. Në veri të fshatit Pashkashesh ndodhet ujëmbledhësi i Skoranës, që furnizohet me ujin e lumit Erzen dhe ka kryesisht funksion ujitje.

Fauna është relativisht e pasur në Bërzhitë, sidomos në zonën me bimësi më të dendur. Ndër kafshët që kanë përhapje më të madhe janë: Ujku, dhelpra, derri i egër, lepuri dhe kunadhja. Në territorin e Bërzhitës rriten edhe shpendë si shkurta, shapka, thëllëza, turtulli etj.