Kjo kala ndodhet në qendrën historike të qytetit të Tiranës, në një nga zonat më të frekuentuara të tij. Ajo përfaqëson një fortifikim fushor me planimetri drejtkëndore 160 x 120m, me pjesën më të gjatë lindje – perëndim. Koha e ndërtimit të kalasë mendohet të jetë në harkun kohor ndërmjet vitit 1633, dhe gjysmës së dytë të shek. XVIII. Kalaja u integrua shumë shpejt me rritjen e qytetit, i cili filloi të zgjerohej si rezultat i zhvillimit të zejtarisë, tregëtisë, etj.
Në vitin 1798 ra në duart e familjes Toptani nga Kruja. Në vitin 1817 Bushatllinjtë e Shkodrës, të cilët ishin në luftë të vazhdueshme me Toptanët, rrethuan kalanë për një përiudhë të gjatë kohe, duke shkatërruar përfundimisht një pjesë të qytetit dhe muret e tij. Nga muret rrethuese të kalasë së dikurshme sot mund të shikojmë vetëm një pjesë te murit verilindor.
Kalaja funksionoi deri në vitin 1832, e cila më pas u shkatërrua nga Mehmet Rushit Pasha.
Brenda mureve të Kalasë së Tiranës është krijuar së fundmi një zonë e re pedonale, e shndërruar në një hapësirë rekreative për kryeqytetin. Kjo zonë shërben si një mjedis ku promovohen artizanët dhe traditat lokale, kulinaria dhe arti i Tiranës.