I vetmi Park Zoologjik publik në Shqipëri është ndërtuar në vitet 1960-196 dhe ka përfunduar në vitin 1966, sipas një projekti të hartuar nga specialistë të huaj.
 Fillimisht u ndërtua galeria qendrore, ku gjatë viteve u ekspozuan kafshë si: rriqebulli, ujku, dhelpra, sorkadhja, shqarthi, qelbësi, ketri, baldosa, kaprolli, gjarpërinj, etj; si dhe shpendët si: shqiponja, pelikani, qyqja, huta, skifteri, bufi, lejleku, thëllënxa, shkurtëza, fazani, korbi, etj. Më pas në Kopshtin Zoologjik (siç njihet në gjuhën e përditshme) u ndërtuan edhe basenet ujore (liqenet e vogla ku u ekspozuan shpendë si: mjellmat, rosat e egra dhe u kultivuan peshku i kuq dhe krapi). Rreth viteve 1973, Kopshti Zoologjik u pasurua me pavionin e zogjve, ku rriteshin për ekspozim dhe tregëtim zogj si: kanarina, pëllumba të butë, gardelina, papagaj, pallonj dhe fazanë.

Pas viteve 1990, ky Park Zoologjik nuk përmbushte më standartet dhe konceptet bashkëkohore.
Parku Zoologjik, një hapësirë e transformuar dhe e përkryer për argëtimin e fëmijëve, është rikonceptuar si një mjedis i përshtatshëm për kafshët, si dhe me hapësira çlodhëse për vizitorët. Parku Zoologjik u pasurua me kafshë të egra ekzotike, fermën shqiptare si dhe me mjedise rekreative ku mbizotërojnë hapësirat e gjelbra të shfrytëzueshme edhe për piknik, këndet e lojërave për fëmijë, por dhe mjediset edukative për studentët dhe nxënësit.
Një hapësirë e veçantë në këtë park i është dedikuar klasave didaktike. Këto mjedise do të mirëpresin nxënës dhe studentë duke u ofruar mundësi për të eksploruar botën e larmishme të kafshëve.