Ky është parku publik qendror i kryeqytetit, konceptuar në 1931 dhe ndërtuar në vitin 1949, që mbulon një sipërfaqe prej 29.81 ha.
Projekti i parë filloi që në vitin e largët 1923, por varianti më i suksesshmëm daton në 1931 dhe mban firmën e arkitektëve italianë Brasini dhe De Fausto. Sipas këtij plani, u ndërtua kompleksi i ministrive, Bashkia e Tiranës, Banka Kombëtare, lulishtja e këtij kompleksi qendror, sheshi “Skënderbe” me shatërvanin rrethor, si dhe hapësira që sot njihet si Parku “Rinia”.
Ndërsa, më 28 nëntor 1949, me punë vullnetare, filloi pyllëzimi i parkut nga të rinjtë tiranas, aksion që i dha emrin që mban edhe sot Parku “Rinia”.
Me rastin e festimeve të pesë vjetorit të Çlirimit në vendin e projektuar për park, bleronte një pyll madhështor eukaliptesh, plepash e akaciesh. Më vonë aty u ndërtua një kompleks me kafene dhe restorante, duke e quajtur  “Taiwan”.
Sot ky park mund të quhet tërësisht i transformuar në një hapësirë rekreative dhe argëtuese sepse përshtatet me kënde lojërash për më të vegjlit, mjedise për të moshuarit dhe dashamirësit e parqeve.