U përurua në 14 tetor 1988 si muzeu i diktatorit Enver Hoxha (1908-1985). Ndërtimi i saj filloi në vitin 1986 dhe përfundoi në vitin 1988 duke shërbyer si një muze i trashëgimisë së E. Hoxhës deri në vitin 1991.
 Kjo strukturë u projektua si krahë shqiponje, simbol i vetë kombit, por i dukshëm si i tillë vetëm nga lart. Ndërsa nga këndvështrimi i kalimtarit ngjason me një piramidë. Për projektimin e saj punoi një grup arkitektësh nën drejtimin e vajzës dhe dhëndrit të E.Hoxhës.
E njohur në zhargonin e përditshëm si piramida, ajo zuri vend në bulevardin “Dëshmorët e Kombit”, në një nga pikat më nevralgjike të qytetit.
Pas vitit 1991 Piramida u shndërrua në Qendër Kulturore Ndërkombëtare ku u mbajtën shumë ekspozita, konferenca  si dhe panaire kombëtare dhe ndërkombëtare.
Piramida është një simbol i periudhës së tranzicionit. Fillimisht shërbeu si muzeu i një diktatori, më vonë u kthye në një hapësirë për aktivitete të lira dhe tani është futur në rrugën e zhvillimit ekonomik e shoqëror. Ajo është kthyer në qendrën më të madhe për të rinjtë, kryesisht e fokusuar në arsimimin digjital, në kulturën e teknologjisë së informacionit dhe në funksion të artit, kulturës dhe kurseve profesionale apo hapësirave të tjera rinore.
Ajo eshte shnderruar gjithashtu ne qendrwn më të madhe teknologjike të rajonit me një projekt të studios   së arkitekturës me famë botërore MVRDV. Ky projekt rivitalizimi u realizua nga AADF (Fondacioni Shqiptaro-Amerikan për Zhvillim) dhe Bashkia e Tiranës.
Ajo është e pajisuar me 18 salla, ku të rinjtë studiojnë IT, robotikë, dizajn, si dhe 14 klasa në natyrë për veprimtaritë e tyre.
Piramida ka ambjente që mund të përdoren për trajnime, bibliotekë, salla ku njerëzit mund të mblidhen, salla ku të rinjtë ekspozojnë punimet e tyre si dhe ofrohen kurse  qe kombinojne teknologjinë me dizajnin.
Programet që ofrohen nga qendra TUMO janë: animacion, zhvillim i lojërave, kinematografi, web design, muzikë, shkrim, vizatim, dizajn grafik, modelim 3D, programim, robotikë, grafikë lëvizje, fotografi, media e re. Në mjediset e Piramidës kapaciteti pranues eshte deri në 4000 nxënës në javë.