Njoftim - Afati i ri i dorëzimit të projekt propozimeve - Programi ReLOaD

ReLOaD - Afati i ri i dorëzimit të projekt propozimeve për Thirrjen e tretë në kuadër të Programit Rajonal për Demokracinë Vendore në Ballkanin Perëndimor (ReLOaD)

Në kuadër të lehtësimit të masave të marra nga qeveria për menaxhimin e situatës së pandemisë Covid-19, Bashkia Tiranë shpall datën e re të mbylljes së aplikimeve për Thirrjen e tretë të Projektit ReLOaD.

Afati i ri për dorëzimin e Projekt-Propozimeve ështe data 17/06/2020, ora 15:00.

Në përputhje me VKM-të dhe masat e marra për menaxhimin e situatës së pandemisë, gjatë muajit Qershor do të njoftoheni për zhvillimin e një takimi informues (Online ose pranë ambjenteve të Bashkisë Tiranë), për të asistuar të gjitha OSHC-të të cilat kanë pyetje rreth aplikimit.

Prioritetet e Thirrjes së Tretë ReLOaD në Bashkinë Tiranë, të vendosura gjatë takimit konsultues me OSHC-të me datë 20/02/2020 janë si më poshtë :

Prioritet 1 – Aktivizimi dhe Fuqizimi i Rinisë:
1.1: Organizimi dhe fuqizimi i zërit të të rinjve për çështjet lokale, kulturore dhe demokracinë vendore
1.2: Edukimi mbi shëndetin mendor, fizik, menaxhimin e situatave të panikut (lufta kundër dhunës dhe bullizmit / emergjencat civile)
1.3: Nxitja e punësimit të të rinjve për ide inovatore biznesi në fushën e teknologjisë kreative, turizmit, artit dhe kulturës


Prioritet 2 - Zhvillimi Social:
2.1: Mbështetje për bizneset sociale / nxitja e punësimit të grupeve të margjinalizuara
2.2: Përdorimi i teknologjisë dhe inovacionit për ofrimin e shërbimeve sociale

Prioritet 3 - Zhvillimi i qëndrueshëm dhe mbrojtja e Mjedisit:
3.1: Përmirësimi i cilësisë së ajrit, ujit dhe tokës
3.2. Zbutja e efekteve dhe adaptimi ndaj ndryshimeve klimatike (edukimi i komunitetit mbi përballimin e situatave të motit ekstrem emergjencave natyrore)


DORËZIMI I APLIKIMEVE:
 

Aplikimet e plotësuara (me të gjithë dokumentet mbështetëse) duhet të dorëzohen në tri (3) kopje të shtypura dhe një kopje elektronike (CD apo USB), të vendosura në një zarf të vulosur mbi të cilin është shkruar referenca e thirrjes publike, përmes postës zyrtare apo personalisht, gjatë ditëve të punës (e hëne – e premte), nga ora 09:00 deri ora 15:00, në adresën në vijim:

Bashkia Tiranë - Zyra e Protokollit, Sheshi Skënderbej, Nd. 2, Kodi postar 1001, Tiranë, Shqipëri

Afati për dorëzimin e aplikimeve është data 17/06/ 2020, ora 15:00. Aplikimet e dorëzuara pas këtij afati do të merren parasysh vetëm nëse vula postare tregon se data dhe koha e dërgimit ka qenë para mbylljes së afatit zyrtar. Pjesa e jashtme e zarfit duhet të përmbajë titullin e thirrjes për dorëzimin e propozimeve, emrin dhe adresën e plotë të kandidatit, emrin e plotë të projektit dhe mbishkrimin “Të mos hapet përpara hapjes zyrtare.” Formulari për regjistrimin e dokumentacionit të pranuar lëshohet nga përfaqësuesi i bashkisë. Të gjithë aplikantët që kanë paraqitur propozime, pavarësisht nëse pranohen ose jo, njoftohen me shkrim për vendimin e marrë për projekt-propozimin e tyre brenda 15 ditëve pune nga mbyllja e thirrjes publike. Rezultatet do të publikohen në faqen e internetit të bashkisë (www.tirana.al).

KUJDES !!!

OSHC-të aplikuese rekomandohen të marrin parasysh në mënyrë rigoroze masat e nevojshme të sigurisë për zhvillimin e aktiviteteve të propozuara në projektet e tyre, duke u siguruar për shëndetin e tyre dhe të qytetarëve.

Për çdo pyetje apo paqartësi në lidhje me aplikimin mund të nisni një email në adresën [email protected]

Të gjitha informatat e nevojshme, si edhe një version elektronik i paketës së aplikimit mund të gjenden më poshtë: