THIRRJE PUBLIKE PËR ORGANIZATAT E SHOQËRISË CIVILE PËR DORËZIMIN E PROJEKT PROPOZIMEVE NË PROGRAMIN “KUJDESI SOCIAL DHE SOLIDARITETI”

Bashkia Tiranë hap thirrjen për projekt-propozime në programin “Kujdesi Social dhe Solidariteti”. Qëllimi i përgjithshëm i programit është përmirësimi i cilësisë së jetesës së kategorive në nevojë. Ky program përmban projektet e fondit social dhe do të shërbejë në realizimin e këtyre projekteve inovative me karakter social që kanë në  fokus: fëmijët, të rinjtë, personat me aftësi ndryshe, të moshuarit në nevojë, fuqizimin social dhe stabilitetin ekonomik të gruas kryefamiljare dhe grave në nevojë nëpërmjet zgjerimit të rrjetit të shërbimeve sociale të mundësuara nga Drejtoria e Përgjithshme e Shërbimeve Sociale, Bashkia Tiranë.

Bashkia Tiranë fton të gjitha Organizatat e Shoqërisë Civile (OSHC-të) në Tiranë që të paraqesin projekt-propozime që janë në përputhje me projektet e fondit social në “Programin e Kujdesit Social dhe Solidaritetit” të përcaktuara më poshtë:

    1. Shërbime ditore emergjence për fëmijët dhe familjet në nevojë
    2. Linja këshilluese dhe shërbime mbështetëse për familje në nevojë
    3. Nxitja e fuqizimit social të grave në nevojë dhe trajnimi profesional i tyre
    4. Shërbime për të moshuar dhe ofrimi i shërbimit në banesë
    5. Shërbime për aftësinë e kufizuar dhe ndërhyrje të hershme në komunitet
    6. Shërbime në mbështetje të të rinjve
    7. Shërbime për kategorinë në nevojë

Të gjitha organizatat e shoqërisë civile të interesuara mund të gjejnë informata të hollësishme rreth kushteve për aplikim si dhe për kriteret për financimin e projekteve në Udhëzimin për Aplikant, që është pjesë përbërëse e dokumentacionit të thirrjes publike. 
Shuma e fondit për projektet e miratuara në total do të jetë 24,000.000 Lekë. Kohëzgjatja e secilit projekt do të jetë 12 muaj. 

Dokumentacioni i aplikimit për thirrjen publike të Bashkisë Tiranë do të jetë i disponueshëm nga data 11.10.2019. Një version elektronik i paketës së aplikimit mund të gjendet edhe në web-faqen zyrtare të Bashkisë (http://www.tirana.al).

Thirrja për projekt-propzime hapet ditën e premte, datë 11.10.2019 dhe mbyllet ditën e premte, datë 08.11.2019, ora 16.00

Sesioni informues (ditët e hapura) lidhur me këtë ftesë me OShC-të e interesuara për të aplikuar do të mbahen në Bashkinë e Tiranës më datë 14.10.2019 në ora 12:00 në Sallën e Këshillit Bashkiak.