16 Dhjetor - Të shembim muret përmes edukimit: kujtimet e pashuara të murit të rrëzuar

Shqipëria ishte një nga vendet që u trondit dukshëm nga rrëzimi i murit të Berlinit, ngjarjet që pasuan dhe era e ndryshimit që kishte filluar të ndjehej në Europë dhe më gjerë. Për arsye të caktuara trajektorja historike e Shqipërisë ishte tepër e veçantë dhe pjesëmarrja e saj në projekt ishte një mundësi mjaft e mirë për t’i bërë me dije qytetarëve në Shqipëri dhe Europë disa nga ngjarjet dhe aspektet më të rëndësishme që formësuan këtë trajektore.

Bashkia e Tiranës zhvilloi pesë intervista në kuadër të projektit “Breaching the walls! We do need education”, për t’u pasuar nga një konferencë me bashkëkohës dhe studiues të këtyre ngjarjeve si edhe studentë apo të interesuar që morën pjesë fizikisht dhe virtualisht në këtë event.

Një element i rëndësishëm ishin dhe vendet ku u zhvilluan intervistat të cilat përveç historisë që përkujtojnë do të lidheshin ngushtësisht dhe me personat që do intervistoheshin. Për këto arsye vendet që u zgjodhën ishin:
- Memoriali “Postbllok” - Intervista e zhvilluar me Simon Mirakaj – ish i përndjekur politik dhe i internuar nga sistemi.
- Instalacioni “Skoda Liaz” - Intervista e Ylli Bodinaku, i cili punonte si shofer në një ndërmarje në ato vite.
- Godina “Liria” në Qytetin Studenti - Intervista e Arian Nikaj – ish student dhe një ndër organizatorët kryesorë të protestës.
- Sheshi "Skënderbej" - Intervista e Sherif Merdanit si artist dhe ish i burgosur politik.

Qëllimi kryesor i këtyre intervistave ka qenë evidentimi i sa më shumë këndvështrimeve mbi këto ngjarje. Gjithashtu jemi përpjekur që të intervistuarit mos të jenë të gjithë pjesëtarë apo aktorë të të njëjtës shtresë apo grupimi shoqëror. Në to janë të përfaqësuar studentët, pjesë e revoltës, të internuarit, të burgosurit, intelektualët, artistët, rinia, klasa punëtore e kohës.
Çdo intervistë, çdo informacion, çdo aspekt i trajtuar synon të shfaqë një panoramë sa më të plotë për brezat e rinj, jo vetëm në Shqipëri por edhe për ata të rinj europianë të interesuar mbi rrjedhën e ngjarjeve në Shqipëri. Jemi përpjekur të sigurojmë për to informacion mbi mënyrën e jetesës së shqiptarëve gjatë regjimit të Hoxhës, mendësinë dhe botëkuptimin e tyre, si informoheshin për ngjarjet në botë cila ishte gjendja e tyre ekonomike, cilat ishin diferencat midis grupimeve të ndryshme shoqërore, si ishte gendja në vendet e internimit, në burgje, cilat ishin shpresat dhe ëndrrat e tyre, raporti i tyre me dijen, me bashkëkohësit e tyre europianë e shumë e shumë të tjera.