TIRANA SMART CITY

Pas dy dekada e gjysëm përpjekjesh për t’u kthyer në një metropol evropian, është koha që Tirana të krijojë një identitet unik dhe të marrë në dorë fatin e saj.

Politikëbërës, investitorë, donatorë, biznese, profesionistë e studentë u bashkuan në 20 janar në ambientet e Hotel Tirana për të marrë pjesë në konferencën Go Tirana Smart City, një nismë të përbashkët, që synonte identifikimin e problemeve apo mundësive të shumta që ofron qyteti dhe diskutimin e ideve për investim dhe ndërhyrje.

“Go Tirana Smart City 2016-2026”, ishte një paradë idesh dhe risish ekonomike, sociale e urbane, organizuar në bashkëpunim me UNDP Albania.

Konferenca u bazua në pesë koncepte kryesore:

Lëvizshmëria – Të lëvizim Lirisht

Është thelbësore që çdo qytetar të lëvizë pa vështirësi në qytet. Prioritetet tona janë: gjetja e zgjidhjeve për një sistem transporti të sigurt, të pastër dhe miqësor ndaj mjedisit; shpërndarja e informacionit në kohë reale me synim përmirësimin e transportit publik; ulja e ndotjes dhe e emetimit të dioksidit të karbonit. Në ditët e sotme ambientet e punës janë zhvendosur drejt zonave periferike dhe për profesionistët të cilët punojnë në këto zona ne duhet të sigurojmë akses në transport komod dhe të shpejtë.

Shoqëria – Drejtimi i energjisë dhe talentit të qytetarëve

Aseti më i vlefshëm i qytetit tonë janë njerëzit e tij – punëtorë, të përkushtuar dhe krijues, me dëshirë për të përqafuar e nxitur gjithmonë ndryshimin. Tirana e sotme është ndërtuar nga qytetarët e saj. Detyra jonë si politikanë është të gjejmë kanalet e duhura për të kanalizuar shprehjen e talentit dhe energjisë së qytetarëve të saj. Ne po mundohemi të organizojmë ambiente edukimi më të mira, më të shëndetshme dhe më të sigurta për të rinjtë e fëmijët, të cilat do të inkurajojnë pjesëmarrjen civile dhe do të krijojnë qytetarët e së ardhmes.

Jetesa – Një Qytet i Jetueshëm

Një qytet “smart” mundëson përmirësimin e jetesës së qytetarëve të tij me mënyra që ndihmojnë rritjen ekonomike dhe barazinë sociale. Çdo qytet modern ka si barometër cilësie dëshirën e qytetarëve për të jetuar, punuar dhe shpenzuar kohënë të. Një qytet i suksesshëm në këtë aspekt, përmbush nevojat primare të banorëve, por në të njëjtën kohë mbetet tërheqës, duke përmirësuar dhe zbuluar vetveten. Cilësia e jetesës varet në masë të madhe nga shërbimi shëndetësor, siguria, lehtësia e përdorshmërisë së shërbimeve publike, por edhe nga faktorë si ruajtja e trashëgimisë historike e kulturore dhe nga zhvillimi i saj. Ne duhet të ndërtojmë një qytet të jetueshëm për fëmijët tanë dhe në të njëjtën kohë të nxisim qytetarët tanë të jenë edhe më të pavarur dhe krijues.

Ekonomia – Të Ecim Përpara

Nje qytet i vetëmjaftueshëm mund të jetë i tillë, vetëm kur komuniteti përbëhet nga individë të cilët punojnë vazhdimisht për ta përmirësuar atë. Një qytet “smart” duhet të jetë një vend i dëshirueshëm për të jetuar, punuar dhe për të shpenzuar kohë të lirë. Ne mendojmë që çelësi ekonomik, për të vënë në lëvizje këtë proçes, konsiston në shpërndarjen e informacionit, zhvillimin e qendrave të biznesit, dhe në reklamimin e produkteve lokale unike.

Jeta Rurale – Thesari i Fshehur

Ndërkohë që qytetet e mëdha trupëzojnë aspiratat e kombit, fshatrat e fermat sigurojnë mirëqënien e tij. Një zhvillim i qëndrueshëm kërkon balancë ndërmjet modernizimit dhe identitetit tradicional, import, por edhe eksport vlerash, zhvillim urban, por edhe nxitje të jetës rurale. Jeta rurale “smart” përqëndrohet në zhvillimin e bazës ekonomike, të burimeve natyrore, në promovimin e sipërmarrjes dhe turizmit, dhe në ruajtjen e identitetit lokal.

Zbatimi i këtij plani kërkon përpjekje të vazhdueshme dhe të koordinuara. Në këtë frymë, presim me padurim ide të reja e diskutime të hapura për të ardhmen e komunitetit tonë dhe të gjeneratave që do të vijnë.

I Juaji,

Erion Veliaj

Kryetari i Bashkisë Tiranë

Smart city